Minnst þúsund manns mótmæla vegna Samherjaskjalanna

Minnst þúsund manns hafa í dag mótmælt í strandbænum Walvis Bay í Namibíu í dag. Tilefni mótmælanna eru Samherjaskjölin og spilling. Mótmælendurnir segja, samkvæmt Namibian, að málið umdeilda varpi ljósi á brot á réttindum þeirra.

Þá hafi skandallinn sérstök áhrif á þá sem búa í Walvis Bay þar sem íbúar treysta á auðlindir hafsins. Mótmælendur segja einnig að „spilltir hættir“ þeirra sem grunaðir eru vegna málsins hafi leitt til fækkunar starfa og aukinnar fátæktar.

Embættismenn og aðrir háttsettir í Namibíu eru sakaðir um að hafa þegið mútur frá Samherja í skiptum fyrir ódýran fiskveiðikvóta. Á meðal þeirra sem sakaðir eru um mútuþægni eru SWAPO-liðarnir Bernhardt Esau, fyrrverandi sjávarútvegsráðherra, og Shacky Shanghala, fyrrverandi dómsmálaráðherra, sem sögðu báðir af sér í kjölfar Samherjamálsins og sitja nú í gæsluvarðhaldi.

Kosningar voru nýverið haldnar í Namibíu þar sem Hage Geingob, sitjandi forseti Namibíu og frambjóðandi SWAPO-flokksins, hlaut endurkjör með 56,3 prósent atkvæða. Panduleni Itula, mótframbjóðandi hans, hefur ekki viðurkennt niðurstöðuna en einhverjir mótmælenda í Walvis Bay hafa notað tækifærið og lýst yfir stuðningi við Itula.