Perlur Íslands: Ellefta lundabúðin í sérstöku uppáhaldi

„Þegar ég hugsa um uppáhalds ferðamannastaðinn minn á Íslandi koma nokkrir strax upp í hugann og erfitt að gera upp á milli. Ég gæti nefnt skrilljón náttúruperlur sem standa hjarta mínu nærri en upp á síðkastið hefur verið svo áberandi tómlegt um að litast í heimabyggðinni minni, miðbæ Reykjavíkur að mér finnst það verðskulda sérstaka athygli,“ segir sjónvarpskonan Guðrún Sóley Gestsdóttir sem ætlar að ferðast töluvert innanborgar í sumar.

„Útsýnispallurinn í turni Hallgrímskirkju. Algjör lauma, stórkostlegt útsýni yfir borgina og gagnlegur nýr vinkill fyrir borgarbúa.“

Guðrún segist þykja einstaklega vænt um sundlaugar borgarinnar.

„Verð þá víst að velja eina, er Laugardalslaugin ekki vinsælust meðal ferðamanna? Allavega, ég er illa sundsvelt eins og allir Íslendingar og þrái klórilminn, gufu og víxlböð.“

Næsta atriði sem hún velur er nokkuð frumlegt komandi frá Íslendingi.

Dásemdarkaffihús

„Ellefta lundabúðin á Laugavegi, til vinstri á leið upp, er einstaklega sjarmerandi. Þar ríkir góður andi og hægt að fá alls konar spennandi varning.“

Perlan er síðan einnig einn af hennar uppáhaldsstöðum.

„Hefur skipst mjög á að vera næs og alls ekki næs í gegnum tíðina. Í augnablikinu finnst mér hún frábær - efst er dásemdarkaffihús og veitingastaður þar sem gott er að sitja og ræða málin, þá helst eftir smá labb í Öskjuhlíðinni.“

Svo að lokum nefnir hún norðurljósin.

„Norðurljós. Kannski ekki staður, en líklega eftirsóttasta ferðamannaupplifunin. Þar skil ég túristana vel, mér finnst þau alltaf jafn áhrifamikil og falleg og það gleður mig í hvert sinn sem þau birtast, þó ég hafi búið hér alla mína ævi.“