27 dagar í Pepsi Max: Mestu yfirburðirnir í fjórtán ár

Pepsi Max deild karla fer aftur af stað 13. júní næstkomandi. Það er mikil spenna fyrir því að boltinn fari aftur að rúlla en lengsta undirbúningstímabil í fótboltaheiminum varð enn lengra þökk sé kórónuveirunni.

Vísir ætlar að telja niður í fyrsta leik með því að rifja upp eitt og annað frá sögu úrvalsdeildar karla í knattspyrnu. Í dag eru 27 dagar í fyrsta leikinn sem verður á milli Vals og KR á Hlíðarenda 13. júní næstkomandi.

Í dag ætlum við að skoða aðeins betur yfirburði KR-liðsins í Pepsi Max deildinni í fyrra út frá sögunni því KR vann fimm fleiri sigra en næstu lið í töflunni.

Þegar Pepsi deild karla lauk síðasta haust þá voru KR-ingar heilum fjórtán stigum á undan Breiðabliki í töflunni. Aðeins einu sinni áður hafði lið unnið titilinn með meiri mun síðan að þriggja stiga reglan var tekin upp árið 1984.

Metið eiga ennþá FH-ingar frá árinu 2005 en FH vann þá deildina með sextán stiga mun eftir að hafa unnið fimmtán fyrstu leiki sumarsins.

KR-ingar slógu samt met FH í tólf liða deild (13 stig) með því að vinna Breiðablik í lokaumferðinni. KR bætti líka met félagsins yfir mestu yfirburði um fimm stig en KR-liðið vann með níu stiga mun þegar Íslandsmeistaratitilinn kom í fyrsta sinn í 31 ár í Vesturbæinn haustið 1999. KR vann líka titilinn með 9 stiga forskoti sumarið 1959 en þá voru þó bara tvö stig gefin fyrir sigur.