Urriðafoss kominn yfir 100 laxa

Urriðafoss við Þjórsá opnaði fyrst allra svæða á landinu fyrir laxveiðimönnum en svæðið er eitt það vinsælasta á landinu.

Það er ekki erfitt að sjá af hverju svæðið er jafn vinsælt og það er en veiðin þar fór í gær yfir 100 laxa og stangirnar hafa verið að taka kvótann síðustu daga á stuttum tíma. Eftir opnun sem skilaði 18 löxum á land róaðist veiðin aðeins en hefur aftur tekið vel við sér. "Veiðin var að detta í 100 laxa í dag, sem bara frekar gott, áin opnaði með frábærum hvelli en svo komu rólegir 3-4 dagar á eftir, svo á föstudaginn síðast liðinn datt inn ný ganga og síðan þá er búið að vera frábært" segir Stefán Sigurðsson hjá Iceland Outfitters sem er leigutakinn að ánni í spjalli við veiðivísi.

Efri svæðin í Þjórsá, svokölluð tilraunasvæði eru ekki ennþá komin inn en það hlýtur að styttast í fyrsta laxinn þar því laxinn sem veður í gegnum svæðið við Urriðafoss heldur för sinni áfram upp Þjórsá í gegnum tilraunasvæðin og þar getur verið góð veiðivon og veiðileyfin ekki dýr.