Olmo með tvö fyrir Leipzig sem andar í hálsmál Dortmund

Spænski miðjumaðurinn Dani Olmo skoraði sitt fyrsta mark í þýsku 1. deildinni í fótbolta í síðustu viku og bætti um betur í kvöld þegar hann skoraði bæði mörk RB Leipzig í 2-0 útisigri gegn Hoffenheim.

Olmo skoraði mörkin tvö með tveggja mínútna millibili, á 9. og 11. mínútu, og er greinilega í góðum gír eftir hléið vegna kórónuveirufaraldursins. Hann kom til Leipzig frá króatíska félaginu Dinamo Zagreb í janúar.

Með sigrinum er Leipzig aðeins stigi á eftir Dortmund í baráttunni um 2. sæti deildarinnar, en liðið er enn átta stigum á eftir meisturum Bayern München. Hoffenheim er í 7. sæti með 43 stig og missti af mikilvægum stigum í baráttunni um sæti í Evrópudeildinni.