Viðbúið að geðheilsunni hraki sé mannúð ekki höfð að leiðarljósi

Senda átti Maní Shahidi, 17 ára íranskan transpilt og foreldra hans úr landi í morgun en hætt var við þau áform því leggja þurfti Maní inn á Barna- og unglingageðdeild Landspítalans í gær vegna alvarlegrar andlegrar vanheilsu hans. Óvissa er enn uppi í máli írönsku fjölskyldunnar.

Fjölskyldan kom til Íslands í mars í fyrra. Faðir Manís hafði kennt japanska heilun í Íran sem nefnist Reiki. Írönsk yfirvöld litu á það sem guðlast. Óttast fjölskyldan mjög öryggi sitt fari hún aftur til Íran þar sem henni hefur verið hótað hrottafengnu ofbeldi.

„Þetta er náttúrulega ekki það sem við viljum í svona málum en það sýnir sig að ef við ætlum að afgreiða mál án þess að hafa mannúð að leiðarljósi og hvað þá í tilfelli barna þá er ýmislegt sem getur gerst. Því miður þá endaði þetta með því að drengurinn var lagður inn á spítala,“ segir Claudie Ashonie Wilson, lögmaður fjölskyldunnar.

Gera á frekara mat á heilsu drengsins en mikil óvissa er uppi í máli fjölskyldunnar.

„Ég myndi telja að í ljósi heilsufars hans og í anda þess sem barni er fyrir bestu að stjórnvöld heimili þá áframhaldandi dvöl hér, þar til niðurstaða fæst í endurtökumáli þeirra en annað myndi náttúrulega að sjálfsögðu stefna lífi og heilsu hans í óþarfa hættu. Það er í engu samræmi við meðalhófsregluna. Ég tel það frekar óboðlegt að stjórnvöld hafi, enn sem komið er, ekki svarað eins og staðna er í dag þá tel ég að það sé stjórnvöld hafi enn sem komið er ekki svarað erindum frá umbjóðendum mínum, hvorki um gagnaafhendingu né um staðfestingu á heimild þeirra til dvalar. Ég sé ekkert annað í stöðunni en að leggja fram formlega kvörtun til dómsmálaráðherra um þessi vinnubrögð Útlendingastofnunar,“ segir Claudie.

En hvað þýðir þetta í raun og veru núna? Vitum við hvort þau verði send úr landi jafnvel næstu daga eða mánuði?

„Eins og þetta er núna, þá þurfa stjórnvöld að leggja til að brottflutningur verði stöðvaður þar til niðurstaða fæst í málinu og við höfum ennþá ekki fengið slíka staðfestingu þannig að þangað til […] þá er það skylda stjórnvalda að svara erindum frá málsaðilum og þau hafa ekki gert það í þessu máli og ég mun ýta eftir því áfram en að öðrum kosti mun ég líka senda kvörtun til dómsmálaráðherra vegna þessa en á einhverjum tímapunkti þurfa þau að svara. Óvissan, eins og staðan er núna, er ekki góð fyrir umbjóðendur mína, sérstaklega í ljósi heilsufars hans [drengsins.]“

Hann óttast ofbeldi, verði hann sendur aftur til Íran?

„Hann hefur náttúrulega talað um að sjálfur og það sem gerir málið ennþá verra er að handtökuskipun bíður þeirra í Portúgal. Það er tvöfaldur ótti sem blasir við þeim, bæði í Portúgal sem þau verða send til og líka í heimaríkinu vegna þess að strákurinn er trans og á sama tíma vegna fjölskylduaðstæðna þar.“