Vonskuveður og appelsínugul viðvörun handan við hornið

Spáð er austan vonskuveðri aðfaranótt föstudags og áfram allan föstudag fram á kvöld með slyddu eða snjókomu í flestum landshlutum. Viðvaranir eru örlítið breytilegar eftir landshlutum en víðast verður vindur 25-33m/s og má búast við varhugaverðum vindhviðum við fjöll.

Víðtækar samgöngutruflanir eru líklegar og bendir Veðurstofa Íslands fólki á að ganga frá lausum munum og sýna varkárni. Ekkert ferðaveður sé á meðan viðvaranirnar eru í gildi.

Að auki má búast við hækkandi sjávarstöðu á allnokkrum stöðum vegna áhlaðanda og líkur á að smábátar geti laskast eða losnað frá bryggju.

„Við bendum fólki á að kynna sér viðvaranir í sínum landshlutum á vefnum okkar og fylgjast vel með veðurspám,“ segir á vef Veðurstofu Íslands.