Upplifði gríðarlega mikla skömm eftir skilnaðinn

Gunnar Valdimarsson er helst þekktur fyrir hæfileika sína á sviðið húðflúra. Hann hefur flúrað nokkra íslenska landsliðsmenn og fleiri þekkta. Saga Gunnars er aftur á móti mögnuð og hefur hann þurft að glíma við áföll á sinni lífsleið. Gunnar er gestur vikunnar í Einkalífinu en þar opnar hann sig um foreldramissi og skilnað.

Árið 2017 gekk Gunnar í gegnum skilnað við barnsmóður sína rétt eftir að móðir hans hafði látist eftir baráttu við krabbamein. Gunnar segist hafa upplifað gríðarlega mikla skömm eftir skilnaðinn.

„Við vorum búin að vera saman í átta ár og mér fannst ég vera fyrstur í vinahópnum sem var að skilja. Á þessum tveimur árum hef ég séð aðra vini mína skilja og ég er alltaf fyrstur til að hringja og segjast vera til staðar, því það gerði enginn fyrir mig og ég man hvað mér leið eins og ég væri alveg einn,“ segir Gunnar. Móðir Gunnars var þarna nýlátin og faðir hans lést þegar hann var sautján ára.

„Ég man að fjölskylda hennar stóða alveg með henni og ég skil það vel í dag. En ég man hvað mér fannst það pirrandi. Ég var alveg einn eftir. Þetta var hrikalega erfitt að það voru augnablik þarna sem ég var nánast búinn að gefa upp. Að eiga börn bjargaði mér og að sjá myndir af þeim upp á vegg, því ég elska börnin mín svo mikið. Maður sér engan tilgang í neinu og langar helst til þess að hverfa. Ég segi ekki að mig hafi langað að kála mér en manni langaði helst til þess að vera ekki til.“

Gunnar skammaðist sín gríðarlega þegar hann fór í gegnum skilnaðinn.

„Þetta var sterk höfnunartilfinning og við sem mannfólk erum ekki góð að taka við slíku. Ég man að ég skammaðist mín gríðarlega og ef það er einhvern þarna úti sem er að skilja þá er enginn ástæða fyrir því að skammast sín fyrir það.“

Í þættinum hér að ofan ræðir Gunnar einnig um húðflúraferil sinn og sérstakt samband sem á með íslenskum landsliðsmönnum, um skömmina sem fylgdi skilnaðinum, um erfitt samband sitt við föður sinn, um lífið í Noregi í dag þar sem hann elur börnin sín tvö upp með barnsmóður sinni og kærustu hennar, um ást sína á tónlist en hann stofnaði á dögunum sveitina Gunnar the fifth sem er tilvísun í ítrekaðan misskilning varðandi nafn hans erlendis og Gunnar ræðir um margt fleira í þættinum.