Þegar Ísland í dag hitti Ásu Huldu Oddsdóttur og Hörð Þór Jóhannsson fyrir rúmu ári, voru þau glíma við ófrjósemi. Þau þráðu ekkert heitar en að eignast barn og nú rúmu ári seinna hefur draumur þeirra loksins ræst. Ísland í dag heimsótti þau aftur og fékk að heyra hvernig síðustu mánuðir hafa verið en innslagið í heild sinni má finna hér neðar í fréttinni.
Ása og Hörður kynntust fyrst í menntaskóla, fóru svo bæði í háskólanám, fjárfestu í draumaíbúðinni og giftu sig. Allt gekk vel en Ása og Hörður höfðu reynt í nokkur ár að eignast barn án árangurs. Kom í ljós að hún var með bæði endómetríósu og PCOS eða fjölblöðrueggjastokkaheilkenni og fór því í lyfjagjöf. Þau voru einnig byrjuð að íhuga tæknifrjóvgun og ættleiðingu.
Erfitt að lýsa hamingjunni
Fyrir rúmu ári áttu þau erfitt með að fara í barnaafmæli og sjá barnamyndir á samfélagsmiðlum, það var einfaldlega of sárt. Óteljandi neikvæð óléttupróf og stöðug vonbrigði höfðu áhrif, auk verkjanna sem fylgdu endómetríósunni.
„Þetta er erfitt. Bæði allar aukaverkanir líkamlega, ég er með rosalega mikla ógleði, magaverkir og krampar. Ég er alltaf þreytt og svo er það andlegi parturinn líka. Hann er eiginlega erfiðari,“ sagði Ása í viðtalinu fyrir ári. Þau reyndu að vera bjartsýn en óttuðust samt á sama tíma að fá aldrei tækifærið til þess að verða foreldrar.
„Hræðslan er hvort þetta muni aldrei virka hjá okkur. Sama hvað við reynum, hvort þetta muni aldrei heppnast.“
En nú er staðan gjörbreytt.
„Öll þessi þrjóska, fjöldinn allur af mismunandi hormóna töflum, aukaverkanir og vanlíðanin sem fylgdi öllu þessu ferli skilaði sér að lokum. Ég get ekki lýst því hversu hamingjusöm við vorum þegar við sáum loksins fyrsta jákvæða þungunarprófið í október 2019, eftir allan þennan fjölda af neikvæðum prófum og gráti,“ skrifaði Ása á Instagram þegar hún tilkynnti þessar gleðifréttir.
Gerði þau sterkari
Hjónin eignuðust litla stúlku fyrir rúmum mánuði síðan. Hún hefur fengið nafnið Hugrún Lea.
„Við erum mjög hamingjusöm og það gengur ótrúlega vel hjá okkur.“
„Ég er farinn að læka myndir af börnum á Instagram aftur, þannig að þetta er allt að gerast,“ bætir Hörður þá við. Ása varð ófrísk á meðan þau voru á bið eftir tæknifrjóvgun hjá Livio. Þegar þau fengu símtalið að komið væri að þeim, var hún nú þegar orðin ófrísk með aðstoð hormónalyfja.
„Við vorum mjög hissa,“ viðurkennir Ása, en parið óttaðist þó að missa, eftir alla erfiðleikana sem á undan höfðu gengið.
„Þetta er búið að vera erfitt, þannig að maður heldur aftur að sér,“ segir Hörður um byrjun meðgöngunnar. Allt gekk þó vel og .að sem gerði ferlið ennþá einstakara, var að systir Ásu var ófrísk á sama tíma og eignuðust þær báðar stúlku með þriggja daga millibili.
„Núna er þetta fullkomið,“ segir Ása.
„Ég held að þetta hafi bæði gert okkar samband miklu sterkara og ég held að við elskum hana bara þeim mun meira af því að þetta var löng bið, hún er dásamleg,“ segir Hörður.
Þau gefa fólki í sömu stöðu og þau voru sjálf í fyrir ári, þau ráð að halda í vonina. Viðtalið má sjá í heild sinni í spilaranum hér fyrir neðan.
