Eyjamenn með fleiri bikarsigra en deildarsigra á síðustu 42 dögum

Það bjuggust allir við því að Eyjamenn færu sannfærandi upp úr Lengjudeild karla í sumar og myndi endurheimta sætið sitt í Pepsi Max deildinni. Miðað við úrslitin á undanförnu þarf Eyjaliðið hins vegar að fara að landa fleiri stigum ef svo á að fara.

ÍBV var með 18 stig eftir 3-0 sigur á Þrótti Reykjavík 27. júlí síðastliðinn en hefur síðan aðeins bætt við sjö stigum. ÍBV liðið er nú í fjórða sæti deildarinnar, sex stigum á eftir toppliði Fram.

Keflvíkingar eru síðan ekki aðeins tveimur stigum á undan Eyjamönnum því þeir eiga líka einn leiki inni á ÍBV.

Eyjamenn hafa aðeins náð í 39 prósent stiga út úr síðustu sex deildarleikjum sínum eftir jafnteflið í Grindavík í gær eða sjö stig af átján. Þetta var fjórða jafntefli Eyjaliðsins í síðustu sex leikjum liðsins í Lengjudeildinni.

Nú er svo komið að Eyjamenn eru með fleiri bikarsigra en deildarsigra á síðustu 42 dögum og það þrátt fyrir að hafa spilað þrisvar sinnum fleiri leiki í Lengjudeildinni.

Eyjamenn hafa nefnilega gert vel í Mjólkurbikarnum þar sem þeir urðu fyrsta liðið til að tryggja sér sæti í undanúrslitum keppninnar í ár.

Jafnteflisleikir Eyjaliðsins hafa meðal annars komið á móti liðunum sem eru núna í 9. sæti (Víkingur Ó.) og 12. sæti (Magni) deildarinnar og þau fjögur töpuðu stig gæti orðið Eyjamönnum dýr.

Næstu þrír leikir eru liðinu gríðarlega mikilvægir eftir þetta hökt því framundan eru þrír heimaleikir á aðeins níu dögum eða frá leiknum við Keflavík á laugardaginn 12. september til leikins á móti Þór sunnudaginn 20. september. Báðir leikir fara fram á Hásteinsvellinum sem og leikur á móti Leikni F. miðvikudaginn 16. september.