Ætlar að fylla vél af Íslendingum til Alicante yfir jólin

Andri Már Ingólfsson, eigandi ferðaskrifstofunnar Aventura Holidays, segist finna fyrir miklum áhuga Íslendinga sem eiga hús á Spáni að fljúga beint til Alicante yfir jólin. Aventura bjóði flug utan með Icelandair þann 19. desember en vélin bíði svo á flugvellinum yfir hátíðirnar og fram að heimflugi þann 3. janúar.

„Þetta er frábært tækifæri fyrir þá sem eiga húseignir á Spáni og kjósa að eyða jólunum í frábæru veðri og öruggum aðstæðum,“ segir Andri Már í tilkynningu.

„Eins og komið hefur fram í fjölda viðtala við Íslendinga á Spáni undanfarna daga, þá er öll nálgun Spánverja gagnvart Covid til fyrirmyndar og suður-Spánn með öruggustu stöðum í Evrópu í dag. Hér gengur lífið sinn vanagang, allar verslanir og veitingastaðir opnir, líkamsræktir, golfvellir og almenn þjónusta. Hér gildir grímuskylda á götum úti og í skólum sem allir virða.“

Vélin frá Icelandair mun lenda á Murcia flugvelli við Alicante, fimmtíu kílómetra frá Torrevieja, og mun bíða eftir farþegum yfir jólin.

Aventura hóf rekstur fyrr á árinu en Andri var áður eigandi ferðaskrifstofunnar Primera Travel og þar áður Heimsferða til 28 ára.