Segir smæstu fyrirtækin skorta stuðning stjórnvalda

Hópur smærri fyrirtækja í ferðaþjónustu segir smæstu fyrirtækin skorta stuðning stjórnvalda þar sem þau geti ekki nýtt aðgerðarpakka ríkisstjórnarinnar.

Jóna Fanney Svavarsdóttir, eigandi Eldhúsferða fer fyrir hópi smærri fyrirtækja, einyrkja og sjálfstætt starfandi aðila í ferðaþjónustu. Um er að ræða hóp sem telur sig utangarðs þegar kemur að björgunaraðgerðum stjórnvalda.

Hópurinn samanstendur af fólki sem er með svokölluð örfyrirtæki. Yfirleitt með einn til þrjá starfsmenn í vinnu.

„Við tókum okkur saman og erum að safna nöfnum á undirskriftarlista og höfum gefið frá okkur yfirlýsingu til stjórnvalda. Á undirskriftarlistann hafa skrifað 300 rekstraraðilar í ferðaþjónustu,“ sagði Jóna Fanney.

Hópurinn kom til vegna björgunaraðgerða ríkisstjórnarinnar. Hún segir allt of marga í þeirri stöðu að geta ekki nýtt þær aðgerðir meðal annars vegna skilyrða sem útiloka þessa gerð rekstrar.

„Okkur fannst ekkert samtal vera að eiga sér stað á milli stjórnvalda og hagsmunasamtaka. Þessi hópur stofnaðist á Facebook og svo óx okkur fiskur um hrygg.“ En stór hópur af sjálfstætt starfandi aðilum eru ekki í Samtökum ferðaþjónustunnar að sögn Jónu.

Kristján Kristjánsson ræddi við Jónu í þættinum Sprengisandi á Bylgjunni í morgun.

Hún segir stöðu fyrirtækjanna misjafna.

„Mörg þeirra eru í einhvers konar dvala. Ég kalla það að vera í dvala þegar þú ert með fyrirtæki eða rekstur þar sem innkoman er engin. Það er ekki hægt að segja að fyrirtækin séu búin að loka en það er engin eftirspurn. Hvorki innlend né erlend.“

Önnur fyrirtæki hafa lokað tímabundið eða fyrir fullt og allt.

Skilyrðin útilokandi fyrir smærri fyrirtæki

„Í upphafi snéru aðgerðirnar fyrst og fremst að starfsfólki öðru en eigendum en ekki að eigendum rekstrarins eða rekstrinum sjálfum.“

„Fyrirtæki sem ekki voru með starfsfólk í einhverju ákveðnu magni voru að því virðist viljandi skilin eftir í fyrstu aðgerðum,“ sagði Jóna.

Þá hafði lánalínur ekki geta nýst á neinum tímapunkti.

Jóna segir skilyrðin útiloka smærri fyrirtæki og veltir því fyrir sér jafnræði.

„Maður spyr sig: Af hverju ekki að aðstoða 300 fyrirtæki þó það séu bara einn til þrír starfsmenn hjá því - en að aðstoða frekar eitt fyrirtæki með 300 starfsmönnum.“

Hún segir þörf á aðstoð til að koma í veg fyrir landsbyggðarflótta.

„Maður spyr sig hvað gerist ef reksturinn stöðvast, hvað gerist ef fyrirtæki fara á hausinn þá verður landsbyggðarflótti. Það er félagslegt vandamál líka.“