Fékk að hanna litasett frá virtasta framleiðanda heims og tileinkaði því öllu Íslandi

„Það má í raun segja að þetta hafi byrjað í Kína. Ég lenti í öðru sæti í keppni í Kína og það hljómar svo sem ekkert rosalega merkilegt þangað til að maður hugsar að það eru 6 milljón skráðir flúrarar,“ segir húðflúrarinn Gunnar Valdimarsson sem hafnaði í öðru sæti í virtri tattoo-keppni sem haldin var í Kína á síðasta ári. Í kjölfarið fékk Gunnar að hanna litasett frá virtasta tattoo litaframleiðanda heims, Intenze. Það tækifæri fékk hann eftir þátttöku sína í keppninni.

Um þrjú hundruð flúrarar tóku þátt í umræddri ráðstefnu sem ber heitið Shanghai Tattoo Convention en í Kína eru til að mynda sex milljón skráðir flúrarar og reyna þeir flestir að komast að á ráðstefnunni. Aðeins nokkrum erlendum aðilum er boðið og var Gunnar meðal þeirra. Hann segir að nýlega hafi síðan forsvarsmenn Intenze haft samband við sig.

„Þeir vildu að ég hannaði litasett og ég hugsaði lengi hvort ég ætti að gera eitthvað spennandi eða eitthvað með mikið notagildi. Það seinna varð fyrir valinu. Ég ákvað svo að heiðra landið sem ég er frá þar sem mér þykir svo vænt um Ísland. Litirnir heita því eftir því.”

Litina er nú hægt að fá alls staðar í heiminum.

„Ég er búinn að vera sponsaður af þeim í nokkur ár. Mér fannst það nú nægur árangur sem slíkur en svo að það sé litasett með mínu nafni á er svona ákveðinn milestone. Það hafa ekki verið margir í gegnum tíðina sem hlotið hafa þann heiður þannig að það má segja að þetta setji smá arfleifðina á ákveðinn stall.”

Í miðjum heimsfaraldri fór Gunnar að gera málverk og segir hann að það hafi opnað enn frekar fyrir sköpun hans og flæði.

„Það er eins og ég hafi tekið smá stökk eftir það já. Þannig að maður er alltaf að bæta sig. Það er það sem gerir þetta skemmtilegt. Þetta er búin að vera talsverð ferð upp á við frá því að ég byrjaði fyrir um tíu árum síðan. Ég hlakka bara til að sjá hvað kemur næst.“

Gunnar segir að ferðin til Kína hafi verið mögnuð.

„Þetta var mikil upplifun og gaman að hafa náð þangað áður en allt fór í steik. Fyndnasta fannst mér að konan sem varð í fyrsta sæti vildi ólm fá tattoo frá mér. Ég náði því ekki því miður en ég sagði henni að þetta ætti í raun að vera öfugt þar sem hún vann. En hún er frá Shanghai og hún var indæl.”