Séra Skírnir stefnir Agnesi og þjóðkirkjunni

Mannlíf greindi frá þessu í gær .Skírni var vikið úr starfi í apríl fyrir brot á trúnaðarskyldu presta og starfs- og siðareglum þeirra. Það var vegna ummæla hans um konu sem sökuð er um skjalafals í bakvarðasveit á hjúkrunarheimilinu Bergi í Bolungarvík.

Héraðssaksóknari hefur ákveðið að ákæra ekki konuna og segist hún ætla í skaðabótamál við ríkið vegna handtökunnar. Sömuleiðis ætli hún að stefna fjölmiðlum og netverjum vegna umfjöllunar og orða um málið.

Biskup sagði um trúnaðarbrot að ræða

Séra Skírnir sagði í viðtali við Vísi, eftir að konan hafði verið handtekin, að hún hefði beitt svikum til þess að fá fjárhagsaðstoð úr líknarsjóði Lágafellskirkju árið 2013 þegar hann var prestur í sókninni. Konan hefði kært hann fyrir brot á persónuverndarlögum, ásamt starfsmanni Mosfellsbæjar, eftir að hann lét kanna hvort hún segði rétt frá.

Skírnir sagðist hafa vitað af henni í bakvarðasveitinni eftir að sýnt var frá þyrlu Landhelgisgæslunnar flytja bakverði vestur í Bolungarvík. Hann hefði íhugað að láta lögreglu vita en látið það ógert. Hann hefði þó talað við Gylfa Ólafsson, forstjóra Heilbrigðisstofnunar Vestfjarða og upplýsti hann um hver væri þar á ferð.

Agnes M. Sigurðardóttir, biskup Íslands, sagði í kjölfarið að það blasti við sér að um trúnaðarbrot væri að ræða.

„Prestar búa yfir þagnarskyldu og þarna er verið að rjúfa hana að mínum skilningi,“ sagði Agnes. Var ráðningarsambandi þjóðkirkjunnar við Skírni rift.

Iðraðist brots síns

Séra Skírnir óskaði í framhaldi eftir því að fá að snúa aftur til starfa.

„Ég iðrast þess að hafa brotið trúnað gagnvart kirkjunni og skjólstæðingi mínum þarna um kvöldið, nú um daginn. Þetta var fljótfærni og gert í framhaldi af meinlausri fyrirspurn, ég las ekki yfir próförk fréttarinnar sem svo birtist og ég áttaði mig um seinan á að þetta væri alvarlegt mál,“ sagði í kröfubréfi Skírnis til biskups.

„Fyrrnefnt brot mitt er tengt þessum kringumstæðum, og kannski flaut úr bikar mínum í símtalinu við blaðakonuna, þetta var ekki fyrir fram ákveðið brot,“ skrifaði Skírnir enn fremur.

Biskup stóð við sitt en Skírnir var á launum hjá þjóðkirkjunni út skipunartíma sinn sem lauk í gær.

Biskup og kirkjan beri sameiginlega ábyrgð

Sigurður Kári Kristjánsson gætir hagsmuna Skírnis í málaferlunum við Agnesi biskup og Þjóðkirkjuna. 

Hann segir að honum virðist sem svo gott sem öll lög og allar þær reglur sem Þjóðkirkjunni og biskup hafi borið að fylgja við meðferð mála séra Skírnis hafi verið brotin.

„Þetta mál er höfðað gegn Þjóðkirkjunni og biskupi persónulega þar sem þau bera sameiginlega ábyrgð á því tjóni sem Skírnir telur sig hafa orðið fyrir. Annars vegar hefur hann orðið fyrir tekjumissi vegna þessara aðgerða allra. Hins vegar telur hann að framganga biskups og kirkjunnar gagnvart honum hafi verið með þeim hætti að hann eigi rétt til miskabóta úr þeirra hendi,“ segir Sigurður Kári við Mannlíf.