Ekki auka á stressið að óþörfu

Við eigum fullt í fangi með að halda fókus, skila af okkur vinnutengdum verkefnum, púsla heimili og vinnu saman þar sem skólastarf er að raskast, halda okkur upplýstum um það helsta tengt kórónuveirunni, fylgja eftir tilmælum Almannavarna, fylgja eftir tilmælum vinnustaðarins, fylgjast með stöðunni hjá vinum og vandamönnum, þvo okkur og spritta.

Hér eru þrjár algengar gryfjur sem gott er að forðast til að auka ekki á stressið meira en þarft er.

1. Ekki „multitaska“ um of.

Að gera margt í einu lætur okkur kannski líða eins og við séum að afkasta meir en í flestum tilfellum er það ekki raunin. Að gera eitt í einu, halda fókus og klára verkefni skilar sér oftar en ekki í betri framlegð og skilvirkari vinnu. Gefðu því að minnsta kosti gaum hvað þú ert að gera þegar þú ert að „multitaska.“

2. Ekki æða úr einu verkefni í annað – það getur ruglað hugann.

Við erum flest að vinna nokkur verkefni yfir daginn en það skiptir máli hvernig við skiptum á milli þessara verkefna. Ef við erum sífellt að æða úr einu verkefni í annað er hugurinn sífellt að koma sér aftur af stað inn í verkefnið. Einfalt dæmi er: Fáðu þér kaffibolla áður en þú byrjar á verkefni í staðinn fyrir að standa upp í miðju verkefni, sækja þér kaffi og þurfa nokkrar mínútur til að koma huganum aftur af stað í það sem þú varst að gera.

3. Hafðu stjórn á síma- og samfélagsnotkuninni.

Á síðustu dögum hafa ótrúlegustu atburðir gerst hér heima og erlendis með tilheyrandi þörf á því að fylgjast enn meira með fréttum og samfélagsmiðlum. Sem er eðlilegt og þarft en miklu skiptir þó að þú sért sjálf/ur við stjórnvölinn með hvernig þú fylgist með. Að klára verkefni og gefa sér síðan tíma í að skoða fréttir gæti verið góð leið. Að ákveða fyrirfram einhverja tíma til að fylgjast með fréttum getur hentað sumum. Aðalmálið er að stýra því hvernig þú fylgist með þannig að notkunin verði ekki hömlulaus og ósjálfráð, sem bæði getur dregið úr afköstum og einbeitingu en ekkert síður aukið á stressið.