Roger Federer hefur unnið alls tuttugu risamót á ferli sínum í tennis og þar af sex sinnum Opna ástralska meistaramótið. Svisslendingurinn hafði stefnt að því að bæta sjöunda titlinum í safnið þar sem mótið fer ekki af stað fyrr en 8. febrúar á næsta ári.
Það hefur hins vegar tekið Federer lengri tíma að jafna sig af aðgerð á hné en reiknað var með og því mun hann ekki taka þátt í mótinu. Hann fór í aðgerð í febrúar á þessu ári en þurfti svo að fara í aðra aðgerð í júní.
Roger Federer won't be playing at the Australian Open after pulling out through injury.
— BBC Sport (@BBCSport) December 28, 2020
Full story #bbctennis
Alls hefur hann tekið þátt á Opna ástralska í 21 skipti í röð. Hann er því að missa af mótinu í fyrsta sinn á þessari öld.
„Roger rann út á tíma. Hann verður ekki líkamlega tilbúinn í þau átök sem fylgja mótinu,“ sagði Craig Tiley, mótstjóri Opna ástralska.
Federer er í endurhæfingu í Dubai sem stendur og stefnir á að taka þátt að nýju í lok febrúar eða byrjun mars. Helstu markmið þessa 39 ára gamla tenniskappa á árinu 2021 eru sigur á Opna bandaríska eða Wimbledon-mótinu í Bretlandi.
