John Snorri þráir kóka-kóla á K2

Í uppfærslu á Facebook-síðu John Snorra segir að í dag hafi John Snorra og félagar hans tveir, feðgarnir Muhammad Ali Sadpara og Sajid Ali, komist í búðir 2, sem eru í um 6.600 metra hæð yfir sjávarmáli.

„Það var erfitt að klifra frá búðum 1 upp í búðir 2,“ skrifar John Snorri á Facebook, þar sem hann bætir við að erfitt hafi verið að festa broddana í ísnun á leiðinni upp.

Þá hafi talsvert verið um grjóthrun og því hafi þremenningarnir þurft að halda hundrað prósent einbeitingu á uppleið. Auk þess hafi broddarnir á vinstri fæti Johns Snorra losnað, en þeim hafi tekist að redda því.

„Okkur líður vel en við þráum að fá okkur kóka-kóla,“ skrifar John Snorri.

Tveir aðrir hópar mættir í búðir 2

Eins og Vísir greindi frá á dögunum er John Snorri alls ekki sá eini sem er að reyna að vera sá fyrsti til þess að klífa K2, næsthæsta fjall heims, að vetrarlagi.

Þrír aðrir hópar hafa sett stefnuna á toppinn þetta vetrartímabilið, þar á meðal fjölmennur hópur á vegum Seven Summit.

Vel er fylgst með fjallagörpunum af áhugamönnum um fjallamennsku og á fjallamennskublogginu Alarnette er staðan reglulega tekin á því hvernig gengur.

Þar kemur fram að auk John Snorra séu Nirmal Purja og teymi hans og Mingma Gyalje og teymi hans komnir á fjallið.

Þar segir einnig að Mingma hafi komist í búðir 2 í gær og að Nirmal hafi ætlað sér að komast á sama stað í gær. Reiknað er með að fjölmennur hópur Seven Summit komist í grunnbúðirnar í tæplega fimm þúsund metra hæð í dag.

Í færslunni á vef Alarnette segir einnig að útlit sé fyrir gott veður á fjallinu til 5. janúar næstkomandi. Því sé viðbúið að hóparnir muni reyna að vinna eins mikla undirbúningsvinnu og hægt er þangað til.

Fylgjast má með gengi John Snorra hér.