Gæsa­húðar­móment þegar heil­brigðis­starfs­menn voru hylltir í ó­vissu­á­standi

Íslendingur búsettur á Tenerife segir það hafa verið fallega upplifun þegar fólk flykktist út á svalir í gærkvöldi og hyllti heilbrigðisstarfsmenn og aðra viðbragðsaðila sem berjast nú við faraldur kórónuveiru á Spáni. Hann segir ástandið jafnframt þrungið mikilli óvissu og viðurkennir að hugurinn leiti nú heim í fyrsta skipti frá flutningum, þó að fjölskyldunni líði afar vel á Tenerife.

Árni Már Valmundarson flutti ásamt fjölskyldu sinni, eiginkonu og tveimur börnum, til bæjarins Los Cristianos á suðurströnd Tenerife um árámótin. Hann vinnur hjá fyrirtæki heima á Íslandi en hefur sinnt vinnunni frá Kanarí síðustu mánuði.

Börnin, sjö og ellefu ára, eru ekki innrituð í grunnskóla úti heldur fá heimakennslu frá móður sinni – enda aðeins ætlunin að búa á Tenerife í hálft ár.

„Við ætluðum að prófa að eiga heima úti í hitanum í nokkra mánuði. Það er náttúrulega algjör draumur að hafa tök á að gera þetta,“ segir Árni í samtali við Vísi.

Varla neitt um að vera

Neyðarástandi var lýst yfir á Spáni vegna kórónuveirunnar í gær og tveggja vikna útgöngubann tók formlega gildi í morgun. Strax um helgina byrjaði þó að bera á auðum götum í borgum og bæjum landsins en á tíunda þúsund eru nú smitaðir af veirunni á Spáni.

Sjá einnig: Gissur Páll létti lund nágranna með svalasöng

Árni lýsir því að strax hafi allt fallið í ró í Los Cristianos í gær. Allir veitingastaðir séu lokaðir og í raun sé varla neitt um að vera í bænum.

„Löggan var hér úti um allt með bílana sína í kallkerfi að segja öllum að halda sig inni. Þeir keyrðu um þetta túristasvæði hér og inn í Las Americas, þar sem er allt fullt af fólki og hótelum. Í gær þurfti maður að vera heima og ef maður er úti á labbinu verður maður helst að vera með innkaupapoka eða á leiðinni í apótek. Þetta er ofboðslega skrýtið. Það eru allir veitingastaðir lokaðir og allur niðurinn sem maður heyrir venjulega er ekki til staðar.“

Una sér vel en hugurinn leitar heim

Víða hefur verið gripið til harðra aðgerða í Evrópu vegna veirunnar, nú einkum á Spáni líkt og áður segir og á Ítalíu, og hafa íbúar í þessum löndum margir leitað leiða til að létta lundina.

Þannig birtust myndbönd af syngjandi Ítölum úti á svölum um helgina og síðustu daga hafa Spánverjar flykkst út á sínar svalir til að hylla heilbrigðisstarfsfólk og aðra viðbragðsaðila sem berjast við faraldurinn eftir að hálfgerðri herferð þess efnis var hrint af stað á samfélagsmiðlum.

Sá hátturinn var hafður á í Los Cristianos í gærkvöldi. Hér fyrir ofan má sjá myndband af fagnaðarlátunum sem Árni tók af svölunum heima.

„Það sem við upplifðum í gær var rosalega flott,“ segir Árni. „Það spurðist hér út um eyjuna og víðar að allir ættu að fara út á svalir, út í glugga og þök að klappa og hrópa húrra og bravó fyrir því fólk sem er að nota orkuna og tímann sinn til að gera eitthvað í málunum. Þar er verið að tala um heilbrigðisstarfsfólk, löggæslu og stjórnsýslu og alla þá sem eru að vinna í þessu. Þetta var rosalega flott móment hér í gær, það var alveg gæsahúð. Það peppaði mann svolítið upp.“

Árni segir þau fjölskylduna hafa unað sér afar vel í Los Cristianos hingað til. Hugurinn leiti þó óhjákvæmilega heim til Íslands í ljósi aðstæðna.

„Það eru vangaveltur í manni núna um hvað tekur við. Við erum í fyrsta skiptið farin að ræða það fyrir alvöru hvort við eigum að koma heim. En við fórum út með þetta markmið að prófa þetta, prófa eitthvað nýtt. Og okkur líður mjög vel hérna.“

Hér að neðan má sjá myndband sem tekið var upp í Madríd, höfuðborg Spánar, á laugardagskvöldið. Madrídarbúar heyrast þar hvetja heilbrigðisstarfsmenn til dáða og þakka þeim fyrir vel unnin störf í baráttunni við veiruna með fagnaðarlátum úti á svölum.