Bein útsending: Skattsvik Development Group

Sýningunni Skattsvik Development Group er streymt beint hér á Vísi klukkan 20 í kvöld. Þetta er fyrsta beina streymið frá Borgarleikhúsinu á meðan á samkomubanninu stendur en leikhúsið ætlar að bjóða Íslendingum upp á þétta dagskrá næstu vikur.

Í hádeginu á morgun mun Ólafur Egill Egilsson leikstjóri fjalla um sýningu sína, Bubbasöngleikinn Níu líf, ásamt því að fjalla um stjörnusýninguna Elly sem hann átti stóran hlut í. Í hádeginu á föstudaginn verða svo tónleikar með Bubba Morthens í beinni hér á Vísi og verður það vikulegur viðburður þar til samkomubanninu lýkur.

Uppfært. Sýningunni er lokið. Fylgist með á Vísi til að sjá fleiri atburði Borgarleikhússins.

Um sýninguna Skattsvik Development Group

Sjálfstæði sviðslistahópurinn Ást og karóki hefur undanfarnar vikur starfað innan veggja Borgarleikhússins undir því yfirskyni að meðlimir hópsins séu að skapa nýja íslenska sýningu um skaðlega karlmennsku. 

Umfangsmikill gagnaleki sýnir að hópurinn hefur þess í stað grætt umtalsverðar fjárhæðir á því að svíkja undan skatti. Milljónir króna sem Borgarleikhúsið greiðir fyrir sýninguna enda í leynilegri bankabók í Sankti Lúsíu í krafti tvísköttunarsamninga, aflandsfélaga, meintrar ráðgjafaþjónustu í Panama og fyrirtækisins Skattsvik Development Group í Dublin.

Meðlimir Ást og karókí: Adolf Smári Unnarsson hluthafi, Birnir Jón Sigurðsson, formaður stjórnar og hluthafi, Friðrik Margrétar- Guðmundsson hluthafi, Matthías Tryggvi Haraldsson hluthafi og Stefán Ingvar Vigfússon hluthafi.

Höfundur: Skattsvik Development Group Limited, 57 Amiens Street, Dublin 1, IRELAND.