Werner sagður klár en óvíst hvort að Liverpool sé tilbúið að borga klásúluna

Þýski framherjinn Timo Werner er tilbúinn að ganga í raðir Liverpool í sumar frá RB Leipzig ef félagið borgar upp klásúlu í samningi hans en hann er falur fyrir 52 milljónir punda. Sky Sports greinir frá.

Þessi 24 ára framherji hefur verið magnaður á leiktíðinni en hann hefur skorað 21 mark í 25 leikjum í þýsku úrvalsdeildinni. Hann hefur verið ein aðalástæðan fyrir því að Leipzig er í toppbaráttunni í Þýskalandi.

Hann hefur verið mikið orðaður við Liverpool og hefur sjálfur lýst yfir áhuga sínum að ganga í raðir liðsins en borga þarf milljónirnar 52 fyrir 15. júní ef það á að losa hann frá þýska félaginu í sumar.

Hann var nálægt því að ganga í raðir Bayern Munchen síðasta sumar en endaði á því að framlengja samning sinn við Leipzig. Þá var klásúlan sett inn í samninginn en hann var nálægt því að fara til Bayern á 26 milljónir punda.

Tvennum sögum fer af því hvort að Liverpool ætli sér að kaupa framherjann í sumar en þeir eru ekki taldir hrifnir af því að borga yfir 50 milljónir punda fyrir þann þýska.