Borgnesingar halda sínum besta leikmanni

Keira Robinson mun halda áfram að spila með Skallagrími í Dominos deild kvenna á næstu leiktíð.

Þetta kemur fram í tilkynningu frá félaginu í dag þar sem lýst er yfir mikilli ánægju með að hafa náð samningum við Keiru sem var í algjöru lykilhlutverki hjá liðinu á síðustu leiktíð.

Keira leiddi Skallagrím til bikarmeistaratitils í fyrsta skipti í sögu félagsins en í bikarúrslitaleiknum var hún valin maður leiksins. Hún var einnig einn besti leikmaður Dominos deildarinnar með 24,1 stig, 8,6 fráköst og 5,2 stoðsendingar að meðaltali í leik.

Skallagrímur var í 4.sæti Dominos deildarinnar þegar keppni var blásin af.