Greindu þrjú ný smit

Þrír greindust með kórónuveiruna síðasta sólarhringinn, samkvæmt nýuppfærðum tölum á Covid.is. Alls hafa því 1.795 greinst með veiruna hér á landi. Tiltölulega fá ný smit hafa greinst á landinu undanfarna daga.

Greint var frá því í dag að tveir einstaklingar í sóttkví í Bolungarvík hefðu greinst smitaðir. Enn eru 45 virk smit á norðanverðum Vestfjörðum, tæpur þriðjungur allra smita á landinu.

Ellefu eru nú á sjúkrahúsi vegna Covid-19, tveimur færri en í gær, og einn liggur á gjörgæslu. Í einagrun eru 149 manns og 784 í sóttkví. Nú hafa 1.636 manns náð bata og 18.858 lokið sóttkví. Alls hafa verið tekin 47.065 sýni og hafa um 700 bæst við á milli daga.

Tíu manns hafa látist í faraldrinum til þessa.

Upplýsingafundur almannavarna vegna veirunnar er á sínum stað klukkan 14 í dag. Víðir Reynisson, yfirlögregluþjónn, Þórólfur Guðnason, sóttvarnalæknir og Alma D. Möller, landlæknir munu fara yfir stöðu mála með tilliti til COVID-19 hér á landi. Gestur fundarins verður Ragnheiður Ósk Erlendsdóttir, framkvæmdarstjóri hjúkrunar hjá Heilsugæslu höfuðborgarsvæðisins.