Fötin reyndust hafa verið skilin eftir af sjósullandi drengjum

Engin ástæða er til að hafa áhyggjur vegna sjóblauts fatnaðar sem fannst við höfnina í Þorlákshöfn í dag. Drengir sem voru að sulla í fjörunni höfðu skilið þau eftir í gærkvöldi.

Lögreglan á Suðurlandi óskaði eftir því fyrr í dag að björgunarsveitir hefðu leit í og við Skötubót í Þorlákshöfn eftir að sjóblautur fatnaður, stuttbuxur, skór og sokkar, fannst í fjörunni við svokallað áburðarplan við varnargarðinn við Skötubót. Ekki var vitað til þess að neins væri saknað en rétt þótti að kanna málið vel.

Nú hefur komið í ljós fatnaðurinn sem um ræðir var skilinn eftir af drengjum sem voru að sulla í sjónum við Þorlákshöfn í gærkvöldi. Þeir skiluðu sér allir heim í gær og allar áhyggjur því ástæðulausar, að því er fram kemur í tilkynningu frá lögreglu.