Hægt að sækja smitrakningaforritið í Appstore

Eigendur iPhone geta nú sótt smitrakningarforrit Landlæknisembættisins Rakning C-19 í Appstore. Smitrakningarforritinu er ætlað er að hraða smitrakningavinnu hér á landi til muna. Forritið er enn sem komið er ekki í boði í PlayStore en Landlæknisembættið bíður græns ljóss frá Google.

Blaðamaður sótti forritið sjálfur í Appstore á tólfta tímanum. Eftir að hafa hlaðið því niður er valið á milli þriggja tungumála; íslensku, pólsku og ensku. Í framhaldinu koma útskýringar á appinu og tilgangi þess.

„Appið vistar ferðir þínar og geymir þær með öruggum hætti í tækinu þínu. Í ákveðnum tilvikum getur rakningateymið sent þér tilkynningu og beðið þig um að senda þeim gögnin. Þá getur þú með einum smelli sent gögnin til rakningateymis almannavarna. Er það gert til að auðvelda rakningu smita meðan á COVID-19 stendur,“ segir í forritinu.

Tækið er sagt geyma staðsetningar síðustu fjórtán daga en eldri gögn eyðast sjálfkrafa.

Tvöfalt samþykki

Í framhaldinu er hægt að skrá sig í rakningu. Þar skráir fólk símanúmerið sitt og samþykkir persónuverndarstefnu appsins og að staðsetningargögnum sé safnað í símann. Er um að ræða fyrra samþykki af tveimur sem smitrakningateymið þarf að fá til að nýta gögnin á endanum, komi til þess.

Síminn sendir sex stafa kóða sem notendur þurfa að skrá. Í framhaldinu er útskýrt að appið muni óska eftir heimild til að skrá ferðir/staðsetningu þína. Því sé mjög mikilvægt að velja í ferlinu möguleikann „Allow while using app“.

Nokkru eftir að appið hefur verið sett upp muni það biðja þig um leyfi til að vista staðsetningar á meðan appið er ekki í notkun. Þá sé mikilvægt að velja „Change to Always Allow“. Það sé skilyrði fyrir því að appið gegni hlutverki sínu.

„Appið mun einnig óska eftir leyfi til að senda þér tilkynningar, til dæmis ef rakningateyminu vantar gögn frá þér.“

Ætti að hjálpa veruleg til við rakningu

Smitrakningateymi sóttvarnalæknis og ríkislögreglustjóra hefur unnið hörðum höndum að því að rekja kórónuveirusmit hér á landi undanfarnar vikur. 

Verkið er torsótt, ræða þarf við smitaða og biðja þá um að rifja upp hverja þeir hafa verið í samskiptum við á því tímabili sem talið er að þeir hafa verið smitandi.

Þar gæti minnið þvælst fyrir fólki og mun forritið því nýtast vel.