Thea Imani á leið í Val

Thea mun skrifa undir samning við Val sem gildir til ársins 2024 en Thea fékk sig lausa hjá danska liðinu Århus United á dögunum.

Þar hafði hún glímt við meiðsli og hélt að endingu heim á leið en einnig hefur hún leikið með til að mynda Oppsall HK í Noregi.

Þetta eru góðar fréttir fyrir Ágúst Jóhannsson, þjálfara Vals, og annað Valsfólk en Thea hefur verið fastamaður í íslenska kvennalandsliðinu.

Valur var með fjögur stig eftir fyrstu þrjá leikina í Olís-deildinni er allt var sett á ís í haust.

Deildin hefst að nýju um næstu helgi en Valur spilar við Stjörnuna á laugardag í Origo höllinni.