Jota orðinn bestur í heimi í meiðslunum

Liverpool liðið hefur vissulega saknað portúgalska framherjans að undanförnu en lítið hefur gengið í sóknarleik ensku meistaranna. Hann hefur ekki spilað síðan 9. desember en hefur greinilega notað tímann í að bæta sig í tölvuheiminum.

Jota er nefnilega númer eitt í heiminum í FIFA leiknum í PlayStation og hefur unnið alla 30 leiki sína. Þar erum við að tala um heimslista í FIFA Ultimate Team Champions.

Síðasti fótboltaleikur Jota var í 1-1 jafntefli á móti danska félaginu FC Midtjylland í Meistaradeildinni. Síðan þá hefur Liverpool liðið aðeins unnið fjóra af fjórtán leikjum sínum í öllum keppnum.

Diogo Jota er á sínu fyrsta tímabili með Liverpool og var búin að skora 9 mörk í 15 leikjum í ensku úrvalsdeildinni og í Meistaradeildinni áður en hann meiddist.

„Síðan að pabbi minn gaf mér mína fyrstu PlayStation þegar ég var krakki þá hef ég haft ástríðu fyrir henni. Ég hef alltaf spilað fótboltaleiki á henni,“ sagði Diogo Jota í viðtali við The Athletic í desember.

Þegar hlé var gert á ensku úrvalsdeildinni í apríl í fyrra vegna kórónuveirufaraldursins þá vann Jota mót ensku úrvalsdeildarinnar í FIFA leiknum þar sem hvert lið tilnefndi einn leikmann. Hann var þá enn leikmaður Úlfanna og vann núverandi liðsfélaga sinn, Trent Alexander-Arnold, í úrslitaleiknum.