Martin rekinn frá Haukum

Í tilkynningu frá Haukum segir að Israel hafi gert marga góða hluti hjá félaginu. „Við berum mikla virðingu fyrir honum enda frábær einstaklingur þarna á ferð sem öllum líkar vel við innan félagsins. Hans verður saknað.“

Haukar töpuðu 100-79 gegn Þór frá Akureyri á heimavelli á sunnudaginn og það reyndist síðasti leikur þeirra undir stjórn Martins. Spánverjinn tók við Haukum af Ívari Ásgrímssyni sumarið 2019 eftir að hafa áður þjálfað Tindastól sem hann stýrði til fyrsta bikarmeistaratitils fyrir þremur árum.

„Unnið er að næstu skrefum“

Haukar hafa unnið þrjá leiki af fjórtán í vetur og eru eins og fyrr segir neðstir í deildinni, fjórum stigum frá næsta örugga sæti.

Nýr þjálfari Hauka mun hafa átta leiki til að bjarga liðinu frá falli en óvíst er hver fær það hlutskipti.

„Körfuboltinn getur verið harður heimur og raunveruleikinn er sá að staða liðsins er orðin mjög snúin og á þessum tímapunkti ákvað stjórn deildarinnar að breyta til. Unnið er að næstu skrefum og við munum láta heyra frá okkur þegar eitthvað er að frétta,“ segir í fréttatilkynningu Hauka.