„Hendir bara gildru fyrir dómarann sem kokgleypir og dæmir víti“

ÍBV vann leikinn 29-28 eftir að víti var dæmt á Vigni Stefánsson fyrir brot á Gabríel Martinez Róbertssyni í blálokin. Hákon Daði Styrmisson skoraði úr vítinu.

Í Seinni bylgjunni voru menn ekki sammála um hvort dæma hefði átt víti en umræðuna má sjá hér að neðan. Afstaða Ásgeirs var skýr:

„Ég veit ekki hvernig hann á að spila vörn ef hann má ekki loka svona. Hann er töluvert fyrir utan. Leikmaðurinn hjá ÍBV sækir snertinguna. Hann vill fá snertinguna – hendir sér hálfgert niður og hendir bara gildru fyrir dómarann sem kokgleypir og dæmir víti,“ sagði Ásgeir.

„Þetta er svolítið stórt hliðarskref“

Jóhann Gunnar Einarsson bar í bætifláka fyrir dómara leiksins:

„Þetta eru áherslurnar núna. Hornamenn fengu aðeins meira rými í sinn leik,“ sagði Jóhann og bætti við:

„Þetta er svolítið stórt hliðarskref, fullstórt því Gabríel er í engu færi, svo hann býður upp á þetta. En þetta er líka spurning um að lesa leikinn. Ef hann hefði bara dæmt línu þá held ég að allir hefðu verið sáttir. En auðvitað dæma dómarar eftir reglunum og Jónas [Elíasson, dómari] mat það þannig að Vignir hefði verið á hreyfingu til að þrengja enn meira færið,“ sagði Jóhann.

Hann tók þó undir með Ásgeiri varðandi það að Gabríel hefði „ýkt“ brotið.

„Hvað átti Vignir að gera, fara frá?“ spurði Ásgeir.

„Hann átti að sleppa þessu hliðarskrefi. Þess vegna er dæmt víti, Ásgeir,“ sagði Henry Birgir Gunnarsson þáttastjórnandi.

„Ég er ósammála því. Hann verður að fá séns á að spila vörnina líka. Ég veit alveg að það eru áherslur á að taka á svona en mér finnst þetta bara ekki dæmi um það sem á að taka út úr leiknum,“ sagði Ásgeir.