Enginn greindist innan­lands í gær

Þetta kemur fram í uppfærðum tölum á síðunni covid.is. 35 eru nú í einangrun, samanborið við 32 í gær. 129 eru nú í sóttkví, en voru 22 í gær. 1.031 eru nú í skimunarsóttkví. Tveir eru nú á sjúkrahúsi vegna Covid-19.

Greint var frá því í gær að einn hafi greinst með kórónuveiruna hér á landi utan sóttkvíar á miðvikudag. Varð það til þess að um hundrað þurftu að fara í sóttkví, þar með talin stafsfólk ION Hótela, Landspítalans og nemendur hjá Mími.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 2,5 líkt og í gær. Nýgengi landamærasmita er nú 7,9, en var 6,5 í gær.

14.739 eru nú fullbólusettir hér á landi og er bólusetning hafin hjá 23.126 til viðbótar.

6.097 manns hafa nú greinst með kórónuveiruna hér á landi frá því faraldurinn hófst í lok febrúar. Þá hafa 29 dauðsföll verið rakin til Covid-19 á Íslandi frá upphafi faraldursins.

Alls voru tekin 639 einkennasýni hjá sýkla- og veirufræðideild Landspítalans og Íslenskri erfðagreiningu í gær. Þá voru 483 sýni tekin á landamærunum eða í seinni landamæraskimun.

Fréttin hefur verið uppfærð.