Lengsta taphrina Njarðvíkur í sögu úrvalsdeildarinnar

Njarðvíkurliðið tapaði með tveimur stigum á móti Val í Ljónagryfjunni í gærkvöldi en liðið var sex stigum yfir fyrir lokaleikhlutann, 63-57. Valsmenn komust mest átta stigum yfir en það dugði ekki heimamönnum að skora sex síðustu stigin.

Njarðvíkingar fengu þó tækifæri í blálokin en klikkuðu á lokaskoti leiksins sem hefði fært þeim langþráðan sigur.

Njarðvíkingar hafa spilað öll tímabilin síðan að úrvalsdeildin í körfubolta var stofnuð árið 1978 en aldrei áður hefur liðið farið í gegnum sex deildarleiki í röð án þess að fagna sigri.

Njarðvíkurliðið tapaði fimm leikjum í röð bæði í október og nóvember 2010 sem og í október og nóvember 2012 en það voru fram að þessu lengstu taphrinur liðsins á einu tímabili í úrvalsdeildinni.

Njarðvík tapaði reyndar fimm leikjum í röð vorið 2012 en tveir af þeim leikjum voru í úrslitakeppninni.

Njarðvíkurliðið hefur nú beðið í 38 daga eftir sigri í Domino´s deildinni en liðið hefur ekki unnið leik síðan fyrir landsleikjahléið í febrúar. Njarðvík vann þá ÍR með sextán stigum, 96-80.

Sá sigur er aftur á móti sá eini hjá liðinu síðan í lok janúar en Njarðvíkingar hafa tapað níu af síðustu tíu leikjum sínum í deildinni.

Næsti leikur Njarðvíkurliðsins er í Grindavík á föstudagskvöldið.