Í beinni frá Laugardalshöllinni

Anton Ingi Leifsson skrifar 6. maí 2021 06:30

Kynningarmynd um mótin sem haldin verða hér á landi í maí.

Stöð 2 eSport mun sýna frá öllum keppnisdögum MSI mótsins sem fer fram í Laugardalshöll en þetta er í sjötta sinn sem mótið er haldið.

MSI er eitt stærsta mót ársins í League of Legends, og eins og áður segir verður það haldið í Laugardalshöll í ár.

Sigurvegarar tólf stærstu deilda heims fá boð um að taka þátt, en GAM Esports frá Víetnam gátu ekki tekið þátt vegna strangra sóttvarnarreglna þar í landi.

John Needham, yfirmaður rafíþrótta hjá Riot Games sem framleiðir League of Legends, sat fyrir svörum á blaðamannafundi í gær.

Hann var meðal annars spurður af hverju Ísland hefði verið valið til að halda mótið í ár.

„Við gerðum stórt áhættumat varðandi kórónaveirufaraldurinn og skoðuðum borgir út um allan heim. Eftir það stóðu vel á annan tug borga sem komu til greina.“

„Reykjavík var valin eftir miklar vangaveltur þar sem við einblíndum á kórónaveriufaraldurinn, ferðalög og fleira. Ísland var það land sem stóð sig lang best varðandi kórónaveirufaraldurinn af þeim löndum sem komu til greina.“

Stöð 2 eSport mun eins og áður segir vera í beinni frá öllum keppnisdögunum en mótið hefst í dag og stendur yfir til 22. maí.

Rafíþróttir