Magnað sjónarspil af glóandi hraunvegg í Nátthaga

Gísli hafði áður komið á slóðir eldgossins en hin þrettán ára Una var þarna í fyrsta sinn. Hún var að hætti ungu kynslóðarinnar með símann á lofti og náði mögnuðu myndbandi af rennandi hrauninu.

Í myndbandinu má sjá viðbrögð unga fólksins og fleiri við sjónarspilinu og sinubruna sem kviknaði í kjölfarið.

Gísli lýsir því þannig að hitinn hafi verið næsta óbærilegur þegar hraunið rann í stríðum straumi niður eftir.

Reynir Hörður, níu ára sonur Gísla, og Don Barry, kennari í jarðvísindum við háskóla í Los Angeles voru líka með í för. 

„Ég er á leiðinni í hringferð með honum og fleirum eftir nokkra daga. Þetta var gríðarlegt sjónarspil fyrir hann því hann hafði aldrei áður séð svona návígi og myndaði mikið, þar á meðal hraunmola sem hann ætlar að nota við kennslu sína ytra,“ segir Gísli.

Minningin hjá Unu og hinum unga Reyni Herði, fótboltaáhugamanni með meiru úr Njarðvík, muni lifa með þeim alla ævi, og þá sérstaklega fyrrnefndur óbærilegur hiti frá hraunrennslinu.