Ómótstæðilegir hvolpar sem ekki hafa sést hér á landi áður

Hvolparnir eru af tegundinni Bracco italiano og er um að ræða fyrsta got nýrrar hundategundar á Íslandi. 

„Þetta eru veiðihundar. Þeir finna fyrir þig bráðina, staðsetja hana og sækja fallna bráð ,“ segir Guðbjörg Guðmundsdóttir, hundaræktandi. 

Þá sæki hundarnir líka særða bráð.

„Þannig ef þú særir bráðina og hún fer í burtu þá finnur hundurinn hana og kemur með hana fyrir þig,“ segir Guðbjörg en hún hafði lengi leitað að hinum fullkomna veiðihundi. 

Um er að ræða tvær tíkur og þrjá rakka. Sem fyrr segir hefur þessi tegund ekki verið ræktuð áður á Íslandi.