Átti ekki að vera í Tókýó en tryggði Brössum gullið

Bæði lönd mættu með nokkuð hefðbundið lið til leiks á miðað við fyrri leiki á mótinu. Spánverjinn ungi Pedri var í byrjunarliði Spánverja en leikurinn er hans 73. á leiktíðinni, eftir að hafa spilað 52 leiki í öllum keppnum með Barcelona, tíu landsleiki fyrir Spán í aðdraganda EM og á mótinu sjálfu auk leikjanna allra á Ólympíuleikunum. Enginn hefur spilað fleiri leiki á einni og sömu leiktíðinni en Pedri er aðeins 18 ára gamall.

Það voru þó Brassar sem voru hættulegri aðilinn í leik sem var nokkuð lokaður hvað færi varðaði í fyrri hálfleik. Brasilíumenn fengu vítaspyrnu á 38. mínútu þegar Unai Simón, markvörður Spánar, braut á Matheus Cunha eftir aukaspyrnu. Richarlison, leikmaður Everton, steig á punktinn en skaut hátt yfir markið.

Í uppbótartíma fyrri hálfleiks komust BRassar hins vegar yfir þar sem áðurnefndur Cunha skoraði eftir klaufagang í vörn Spánverja. Há fyrirgjöf Dani Alves barst til Cunha sem tók boltann niður á teignum og afgreiddi boltann fram hjá Simón í markinu.

Spánverjar þurftu að bregðast við og gerðu tvöfalda breytingu í hálfleik, er Carlos Soler og Bryan Gil, nýr leikmaður Tottenham á Englandi, kom inn á. Skiptingarnar skiluðu árangri þar sem Mikel Oyarzabal jafnaði metin þegar rúmur stundarfjórðungur var liðinn af síðari hálfleiknum.

Hvorugu liðinu tókst að skora eftir það í síðari hálfleiknum og framlengingu þurfti því til að útkljá hvort liðanna fengi Ólympíugull.

Malcom, leikmaður Zenit í Rússlandi, kom inn í lið Brasilíu í upphafi framlengingar, og var sá fyrsti sem Brassar skiptu inn af bekknum í leiknum. Snemma í síðari hálfleik framlengingarinnar lét hann til sín taka.

Antony, leikmaður Ajax, átti þá háa sendingu af hægri kantinum, inn í svæði á bakvið vörn Spánverja á hinum kantinum. Þar komu ferskir fætur Malcoms sér vel er hann stakk af Jesús Vallejo, varnarmann Spánar, geystist að marki og afgreiddi boltann í fjærhornið eftir viðkomu í markverðinum Simon.

Það reyndist sigurmark leiksins og Brasilía vann 2-1 sigur.

Malcom átti upprunalega ekki að vera í leikmannahópi Brasilíu, en var kallaður inn vegna meiðsla Douglas Augusto skömmu fyrir mót. Hann varð hetja Brasilíu sem er Ólympíumeistari karla í fótbolta.

Brasilía ver þar með Ólympíutitilinn sem liðið vann á heimavelli í Ríó 2016, en það var í fyrsta skipti sem liðið vann keppnina eftir silfur 2012 og brons 1996 og 2008. Spánverjar fá silfur í annað sinn, síðast 2000, en liðið fékk sitt eina gull á heimavelli í Barcelona 1992.

Dani Alves bætti þá við heimsmet sitt sem hann á yfir titlafjölda á ferlinum. Hinn 38 ára gamli bakvörður, sem lék með Barcelona, Juventus og Paris Saint-Germain áður en hann sneri heim til Brasilíu, var að vinna sinn 43. titil á ferlinum, og að vinna Ólympíuleikana í fyrsta sinn.