Erum að kíkja til framtíðar en ég hata að tapa

Íslenska karlalandsliðið í fótbolta þarf að spjara sig án Gylfa Þórs Sigurðssonar, Arons Einars Gunnarssonar, Ragnars Sigurðssonar, Alfreðs Finnbogasonar og fleiri í komandi leikjum. Manna sem verið hafa burðarásar í liðinu síðasta áratuginn.

Arnar Þór Viðarsson tilkynnti nýjan landsliðshóp á fundi í höfuðstöðvum KSÍ í gær. Eftir fundinn var hann spurður hvort líta mætti svo á að hann væri farinn að byggja upp nýtt lið í stað þess sem unnið hefur stærstu sigra í íslenskri fótboltasögu:

„Við eigum alltaf að vera í stanslausri þróun. Vegna þess hvað þessi kynslóð og þetta lið hefur náð ótrúlega góðum árangri undanfarin tíu ár þá hefur þróunin kannski aðeins staðið í stað. Það vantar því inn ákveðna kynslóð í þennan hóp,“ sagði Arnar.

Í hópnum sem mætir Rúmeníu næsta fimmtudag, Norður-Makedóníu 5. september og Þýskalandi 8. september eru meðal annars þrír nýliðar, þeir Andri Lucas Guðjohnsen, Mikael Egill Ellertsson og Patrik Sigurður Gunnarsson. Patrik er tvítugur en þeir Andri Lucas, Mikael og Andri Fannar Baldursson 19 ára og Ísak Bergmann Jóhannesson 18 ára. Fleiri eru í hópnum rétt orðnir tvítugir.

Arnar segir að á sama tíma og hann vilji koma ungum leikmönnum inn í hópinn til að þroskast og dafna vilji hann sífellt ná árangri.

„Það er ekkert leyndarmál að við erum að þróa liðið og kíkja til framtíðar. Kári Árna verður ekki í landsliðinu eftir tvö ár, því miður. Þetta eru hlutir sem við þurfum að horfast í augu við og við erum að sjálfsögðu að þróa hópinn og liðið fyrir framtíðina líka. Það breytir því ekki að ég hata að tapa og vil bara vinna næsta leik. Ég vona, og veit það alveg, að allir sem að mæta hingað í þennan hóp trúi því að við getum unnið næsta leik. Þetta er alltaf bæði skammtímaplan og langtímaplan,“ sagði Arnar.