Utan vallar: Er Solskjær of mikið ljúfmenni fyrir Man. United?

Fáir knattspyrnustjórar hafa fengið að eyða jafnmiklum peningi í leikmenn og nú síðast fékk hann ofurstjörnuna Cristiano Ronaldo á silfurfati frá Juventus.

Árangurinn hefur samt látið á sér standa og nú síðast tapaði United liðið 4-2 á móti Leicester City, liði sem hafði ekki unnið deildarleik síðan í ágúst.

Manchester United hefur áður staðið við bakið á Solskjær þegar pressan er orðin mikil og það hefur skilað betri árangri en eins og alltaf virðist liðið skorta stöðugleikann og gæðin þegar væntingarnar eru orðnar miklar.

Stuðningsmenn hinna félaganna vilja Ole áfram

Stuðningsmenn hinna liðanna vilja endilega að Solskjær haldi áfram með United enda flestir sammála því að hægt sé að gera miklu meira með þennan frábæra leikmannahóp. Pirringurinn meðal stuðningsmanna United eykst með hverri slöku frammistöðu liðsins á fætur annarri.

Gagnrýni á að Norðmaðurinn sé að nota vitlausa taktík, skorti staðfestu í leikstíl og að hann sé nota suma leikmenn of mikið og aðra allt of lítið.

Það fer líka mikið í taugarnar á sumum að Solskjær er alltaf brosandi sama hvernig fer. Hann virðist aldrei verða sérstaklega fúll eða reiður. Þess í stað mætir hann góðlegur í viðtöl og reynir að grípa í allt til þess að gera það besta úr stöðunni.

Allar ákvarðanir hans virðast vera teknar eftir mikil fundahöld með aðstoðarmönnum sínum en um leið er hann oft alltaf lengi að bregðast við því sem er greinilega ekki að ganga vel.

Þegar leikstíll liðsins er borinn saman við hin liðin við toppinn þá lítur ekki út fyrir að menn eyði of miklum tíma í taktík eða að setja upp pressu á andstæðinganna heldur meira að leyfa stjörnunum að vera stjörnur. Um leið er ólíklegra að liðið vinni nógu vel saman og þá sérstaklega varnarlega.

Harðstjórarnir Louis Van Gaal og Jose Mourinho á undan honum áttu líka stundum í vandræðum með hópinn en það var ekki nærri því sama púður í leikmannahópnum þegar þeir sátu í stjórastólnum.

Enginn titill eftir þrjú ár

Nú er stórstjarna í hverri stöðu og flestir þeirra hafa verið keyptar fyrir stórar upphæðir og til þess að gera liðið klárt í að berjast um titlana. Nú hefur Solskjær stýrt United í næstum því þrjú ár og enn hefur enginn titill unnist.

Þessi góðlátlega og vinalega framkoma norska knattspyrnustjórans hefur sannfært suma um að hann sé hreinlega of mikið ljúfmenni fyrir knattspyrnustjóra liðs eins og Manchester United. Liðið er fullt af ofurstjörnum sem hlusta kannski ekki alltof mikið á Norðmanninn sem er ekki sá líklegasti til að æsa sig mikið.

Liðið þarf að vinna betur saman

Það er kannski enginn að biðja um hárblásara eins og frá Sir Alex Ferguson forðum daga en það blasir samt við að það þarf að fá liðið til að vinna betur saman að því að nýta sér betur þau gæði sem eru þar innanborðs.

Það er erfitt að sjá fyrir sér að Solskjær verði rekinn. Hann er mjög vel liðinn náungi og virðist vera í góðu sambandi við eiganda félagsins. Þarna erum við líka að tala um manninn sem tryggði félaginu þrennuna ógleymanlegu með sigurmarkinu í Meistaradeildinni vorið 1999.

Nú eru samt gríðarlega mikilvægir dagar fram undan. Meistaradeildin gæti verið í hættu með slökum úrslitum á móti Atalanta og svo eru það erkifjendurnir í Liverpool um næstu helgi þar sem tap gæti nánast tekið liðið úr allri titilbaráttu í bráð.

Þróun mála í stjórnartíð Solskjær er að þegar væntingarnar vaxa þá hefur liðið gefið eftir og þegar sæti hans fer að glóa þá fer aftur að ganga betur.

Það skýrist örugglega margt í næstu tveimur leikjum. Góð úrslit þar breyta miklu en slæm úrslit kalla á enn harðari viðbrögð stuðningsmanna og annarra.

Þurftu að dúsa í 45 mínútur í klefanum eftir leik

Það er auðvelt að kunna vel við Norðmanninn vinalega en það er ekki góðmennskan sem mun gera United aftur að meistaraliði. Samkeppnin er mikil á öllum stöðum og þrátt fyrir frábæran leikmannahóp þá er það undir stjóranum komið að fá þá til að vinna sem best saman.

Síðustu fréttir úr herbúðum United er að Solskjær hafi verið öskuillur eftir Leicester-leikinn og látið leikmenn dúsa inn í klefa í 45 mínútur eftir leikinn. Kannski er karlinn búinn að átta sig á því að stundum þarf hann að setja vinalega Norðmanninn til hliðar og rifja upp einn hárblásara frá Sir Alex. Solskjær ætti að hafa heyrt þá nokkra á sínum ellefu árum sem leikmaður Ferguson.

Það þarf eitthvað að breytast og þeir sem eru ekki alveg búnir að afskrifa taktík norska stjórans verða samt að fá skýr skref í rétta átt í þessari viku.