Einn vin­sælasti rappari Sví­þjóðar skotinn til bana

Expressen segir frá því að sést hafi til tveggja manna hlaupa af vettvangi árásarinnar, en enginn hefur enn verið handtekinn.

Einár hét réttu nafni Nils Kurt Erik Einar Grönberg og var hann með margar milljónir hlustana á Spotify. Hann hafði unnið til sænsku tónlistarverðlaunanna, Grammis, bæði sem nýliði ársins og besti hip-hop listamaður ársins.

Hann var nítján ára gamall.

Ola Österling, talsmaður lögreglu, segir að vitni hafa verið að árásinni.

Tilkynnt var um árásina við syðri Hammarbyhöfnina klukkan 22:50 að staðartíma í gærkvöldi. Mikill fjöldi lögreglumanna var þá kallaður á staðinn og kom að alvarlega særðum manni. Hafði hann verið skotinn í höfuðið og bringu. Hann var í framhaldinu úrskurðaður látinn.

Rannsókn lögreglu er í fullum gangi.

Einar fæddist í Stokkhómi árið 2002 og sló í gegn sextán ára gamall með laginu Katten í trakten sem náði efsta sæti sænska vinsældalistans. Sama ár, 2019, gaf hann út sína fyrstu plötu, Första klass.