Uppljóstrarinn Halldór selur höll sína í Garðabæ

Jakob Bjarnar skrifar 5. nóvember 2021 15:17

Halldór Kristmannsson hefur nú sett höll sína í Garðabæ á sölu. Samkvæmt heimildum Vísis er Halldór að flytja búferlum til Sviss.

Halldór Kristmannsson, fyrrverandi framkvæmdastjóri hjá Alvogen, hefur sett höll sína í Garðabæ á sölu.

DV greindi frá þessu en meðal annars sjá má húsið auglýst á fasteignavef Vísis. Um er að ræða 932 fermetra glæsihús, eitt hið stærsta landsins, sem á sínum tíma var hannað af dönsku arkítektastofunni Gassa. Gunnar Sverrir löggiltur fasteignasali hjá Remax segir að verðhugmyndir séu ekki fyrirliggjandi en uppgefið brunabótamat nemur 350.700.000 krónum. Ekkert er áhvílandi á eigninni.

Húsið sem áður var eitt tákna fjármálahrunsins er nú orðin að einu glæsilegustu höll landsins. Má fastlega reikna með því að ef einhver getur mátað sig inn í höllina og veit ekki aura sinna tal, þá muni húsið fara á óheyrilegar fjárhæðir. En þar mun markaðurinn ráða.fasteignaljósmyndun

Gunnar Sverrir segir húsið, sem steypt var 2008 en var svo fullklárað 2016, einstaklega vandað og á frábærum stað. Ekki verði birtar myndir af eigninni nema af húsinu utanverðu. En þeir sem sýna þessu húsi raunverulegan áhuga geta hitt Gunnar, fengið sér kaffi og skoðað möppu, myndir og teikningar af húsinu. Ef þeim líst vel á geta þeir fengið að skoða eignina. Þegar liggur fyrir mikill áhugi á eigninni, þó nokkrar fyrirspurnir hafa borist.

„Auðvitað vekur þetta athygli enda um einstaka eign að ræða.“

Húsið á sér sögu en eigandi þess, Halldór, lenti upp á kant við Róbert Wessmann, forstjóra Alvogen en Vísir hefur greint ítarlega frá þeim væringum öllum. Frásagnir uppljóstrara sem seinna kom á daginn að var Halldór sjálfur, af ófremdarástandi innan Alvogen, olli verulegu uppnámi fyrr á árinu.

Höllina umræddu keypti Halldór árið 2014 þá ókláraða. Hafði Kjarninn eftir Halldóri að honum hafi boðist að kaupa húsið á mjög góðu verði, en að hann ætlaði að minnka það. Í frásögn DV kemur fram að það hafi í kjölfar efnahagshrunsins 2008 gengið undir nafninu „2007 martröðin.“ Íris Björk Jónsdóttir athafnakona keypti hús sem áður stóð á lóðinni árið 2006 fyrir 50 milljónir og lét rífa það. Íris seldi húsið auk teikninga á 70 milljónir.

Sá kaupandi er ónefndur í umfjöllun DV en hann lýsti því seinna í Séð og heyrt að kaupin hafi reynst sér martröð í kjölfar hrunsins. Landsbankinn leysti til sín húsið óklárað. Bankinn setti húsið á sölum árið 2012 en það var þá verðlagt á 93 milljónir. Seinna var það lækkað niður í 69 milljónir og loks 60 milljónir. Það er svo af Landsbankanum sem Halldór keypti húsið en að sögn DV eru engin þinglýst gögn til um hvað Halldór greiddi fyrir húsið þá.

Samkvæmt heimildum Vísis er Halldór fluttur búferlum til Sviss þó hann sé með annan fótinn á Íslandi.

Fasteignamarkaður Deilur Halldórs Kristmannssonar og Róberts Wessman Garðabær Hús og heimili