128 greindust innan­lands

Þetta kemur fram á síðunni covid.is. Þetta kemur fram á síðunni covid.is. 1.350 eru nú í einangrun vegna Covid-19 samanborið við 1.373 á föstudag. 2.262 eru nú í sóttkví, en voru 1.859 á föstudag. 165 eru nú í skimunarsóttkví. 

Sjö smit kom upp á landamærunum í gær –fjögur virk smit í fyrri landamæraskimun og er niðurstöðu mótefnamælingar beðið í tilviki þriggja.

Fjórtán eru nú inniliggjandi á sjúkrahúsum á landinu vegna COVID-19, en voru sautján á föstudag. Þá eru þrír á gjörgæslu, en voru fimm á föstudag. Á vef Landspítalans segir að meðalaldur inniliggjandi sé 65 ár. Þrír séu á gjörgæslu, tveir þeirra í öndunarvél.

Nýgengi á smiti innanlands, þ.e. fjöldi smitaðra á hverja 100 þúsund íbúa undanfarnar tvær vikur, er nú 454,0, en var 435,0 á föstudag. Nýgengi á smiti á landamærum er nú 28,1 samanborið við 31,1 á föstudag.

Alls hafa 19.547 manns greinst með kórónuveiruna hér á landi frá því faraldurinn hófst í lok febrúar á síðasta ári. Þá hafa 36 andlát verið rakin til COVID-19 hér á landi frá upphafi faraldursins.

Alls voru tekin 964 einkennasýni hjá sýkla- og veirufræðideild Landspítalans og Íslenskri erfðagreiningu í gær. Þá var 1.340 sýni tekin á landamærunum eða í seinni landamæraskimun og 769 í svokallaðri sóttkvíar- og handahófsskimun.