Megas eftir sem áður á heiðurs­launum lista­manna

Allsherjar og menntamálanefnd (amen) hefur ákveðið að ekki verði hróflað við lista yfir þá listamenn sem hljóta heiðurslaun listamanna. Þetta þýðir að ekki verður bætt á lista en samkvæmt lögum má Alþingi árlega veita allt að 25 listamönnum heiðurslaun á fjárlögum.

 Tveir þeirra sem voru á lista féllu frá á árinu, þau Jón Sigurbjörnsson leikari og söngvari og Vilborg Dagbjartsdóttir rithöfundur. Enginn kemur í þeirra stað sem þýðir að á næsta ári verða 23 listamenn sem þiggja heiðurslaun. Sjá má lista yfir þá sem voru á lista á árinu neðst í greininni.

Skiptar skoðanir um Megasarmál í amen

Eins og Vísir hefur greint frá hefur Mugison gengist fyrir því að Magnúsi Eiríkssyni tónlistarmanni hlotnist þessi laun. Samkvæmt þessu verður Mugison og öðrum velunnurum Magnúsar ekki að ósk sinni.

Og þá þýðir þetta jafnframt það að tónlistarmaðurinn Megas verður eftir sem áður á lista. Vísir greindi frá því á dögunum að skiptar skoðanir væru um það innan amen hvort það væri forsvaranlegt að Megas væri á þessum lista yfir valinkunna heiðurslaunalistamenn eftir að fram komu ásakanir á hendur honum, er varða kynferðislegt ofbeldi. 

Bryndís Haraldsdóttir, formaður amen, vill ekki staðfesta að komið hafi til tals að víkja Megasi af lista.

„En það voru ræddir allskonar vinklar. Nokkuð ljóst er að lögin eru tiltölulega skýr um það að þeir sem eru á listanum verði það til æviloka, allaveganna eins og þau eru í dag,“ segir Bryndís í samtali við Vísi. Hún segir að frá amen muni koma fram breytingartillaga við fjárlög eins og hefð fyrir en hún gangi út á, sem fyrr segir að enginn nýr bætist við lista.

„Það hefur verið mikil umræða í nefndinni enda er þessi nefnd glæný og er að koma að þessu verkefni í fyrsta skipti. Við höfum skipst á skoðunum en erum öll sammála um að ráðast í breytingar á lögunum og verklag í kringum þau. Það mun verða okkar fyrsta verk á nýju ári að hefja endurskoðun laganna.“

Til stendur að breyta lögum um heiðurslaunin

Bryndís segir að lögin séu ekki skýr um margt en þau séu nokkuð skýr hvað það varðar að heiðurslaun hljóti listamaðurinn til æviloka, að horft sé til beggja kynja og mismunandi listgreina.

„En engu að síður er samt sem áður kynjahalli og halli varðandi listgreinarnar. 

Það er líka þannig að mér finnst að við eigum að draga einhvern lærdóm af Metoo-byltingunni og í mínum huga er það svo þegar Alþingi heiðrar listamenn að þá þurfi að horfa til aðra þátta en afreka á listasviðinu.“

Bryndís segir það hins vegar flókna umræðu, listaverkin lifi áfram en annað mál sé hvort heiðra eigi listamennina sérstaklega ef svo ber undir.

En var ekki rætt hvort ekki væri hreinlega vert að leggja þessi laun af?

„Jújú, það hefur verið rætt og skiptar skoðanir um það; hvort launin eigi rétt á sér eða eigi að vera í öðru formi í dag. Allar þessar hugmyndir hafa komið upp í umræðunni og verður okkar verk að leysa úr. Ýmislegt breyst síðan þessi hefð var sett á á sínum tíma.“