Það skrýtna er, að við búum oftast sjálf yfir svörunum nú þegar. Samt geta vangaveltur sem þessar tekið frá okkur tíma og orku.
Jafnvel þannig að eftir margar vikur eða mánuði, erum við enn á sama stað: Ætti ég að breyta um starf?
HÉR eru þrjú einföld ráð sem geta gefið þér vísbendingar um það, hvað væri réttast fyrir þig að gera.
1. Hvað segir innsæið þitt?
Þetta er ekki bull eða vitleysa, því allir búa yfir innsæi. Og þetta innsæi reynist okkur oftar en ekki besti leiðbeinandinn.
Prófaðu að velta fyrir þér, hvort þú ættir að skipta um starf? Ef þú finnur jákvæða tilfinningu fylgja þeirri hugsun, er innsæið mögulega að segja þér að fylgja því skrefi eftir. Þótt enginn rökstuðningur fylgi svo sem þeirri tilfinningu annað en jákvæðir straumar.
Ef þú hins vegar finnur fyrir einhvers konar fyrirstöðu innra með þér, er innsæið mjög líklega að segja þér að á þessum tímapunkti, ættir þú ekki að skipta um starf. Það sama gildir: Enginn rökstuðningur fylgir svarinu annað en þessi tilfinning sem veldur óróa eða þú upplifir sem fyrirstöðu.
2. Kannaðu málin
Að leita sér upplýsinga, skoða hvaða störf eru mest auglýst, hvaða reynslu og hæfni sérstaklega er verið að falast eftir og fleira, getur verið ágætis leið til að átta sig betur á því hvort nú sé rétti tímapunkturinn til að skipta um starf.
Hver veit nema það sé einhver allt annar vinnuveitandi, jafnvel í allt öðrum geira, einmitt að leita eftir eiginleikum og hæfni sem þú býrð yfir?
3. Löngun, vilji og geta til að gera meira
Stundum er það fyrst og fremst þörfin fyrir nýjar áskoranir sem verður til þess að við skiptum um starf. Þetta er eðlilegt, enda byggir okkar eiginn vöxtur á því að við séum alltaf að takast á við áskoranir, læra eitthvað nýtt, jafnvel stíga út fyrir þægindarrammann reglulega.
Ef þér finnst viss stöðnum í starfinu þínu í dag, er ástæða til að velta fyrir sér hvort tími sé kominn til breytinga. Stöðnun getur þá líka birst í formi þess að þú finnur ekki sama áhuga, ástríðu og kraft og þú eitt sinn upplifðir í núverandi starfi.
Það getur síðan verið allur gangur á því hvort tækifæri til breytinga finnist í starfsþróun hjá sama vinnuveitanda eða nýjum.