Saga stal 5. sætinu af Ármanni

Fyrir leik liðanna í gærkvöldi var tilkynnt að úrvalsdeildin í CS:GO sem áður hét Vodafonedeildin væri orðin að Ljósleiðaradeildinni. En það var ekki eina breytingin því Saga hefur nú bætt við sig tveimur nýjum leikmönnum, þeim Skoon og Gudda, í stað Pandaz og Cris sem leika nú fyrir XY og átti Skoon heldur betur eftir að mæta sterkur til leiks.

Saga og Ármann hafa átt í miklu basli undanfarið, tapað síðustu þremur leikjum og rétt náð að halda sér fyrir miðju deildarinnar. Í gærkvöldi lá leið liðanna í Mirage kortið enda vildi Ármann alls ekki mæta Sögu í Nuke sem teljast má þeirra heimavöllur. Fyrsta hnífalotan í Ljósleiðaradeildinni féll í skaut Ármanns, sem og fyrstu fellurnar en 7homsen var mættur aftur til leiks og lét skammbyssuna telja hjá Ármanni sem hóf leikinn í vörn (Counter-Terrorists). Fyrsta stigalotan fór þó til Sögu þegar nýliðinn Skoon krækti sér í tvöfalda fellu til að loka fyrstu lotunni. Ármann var þó ekki lengi að svara og vann næstu lotu með kröftugu spili á miðjunni og þar með var spennandi leikurinn hafinn. Liðin léku hratt og skiptust á lotum og var leikurinn öllu jafnari en þegar liðin mættust síðast og Saga pakkaði Ármanni 16-3 í Nuke. Loturnar reyndust Ármanni þó oft dýrar og þrátt fyrir að leikurinn væri algjörlega fram og til baka seig Saga fram úr á betri vopnum og vann síðustu tvær loturnar.

Staða í hálfleik: Saga 9 - 6 Ármann

Saga bætti næstu sex lotum við í upphafi síðari hálfleiks og sýndu að þeim langaði einfaldlega meira til þess að vinna leikinn. Þolinmæði Sögu ásamt hittni Skoon og Dom kom þeim því í virkilega gott forskot gegn máttlausum Ármanni þar sem einungis var líf í tveimur leikmönnum, þeim Kruzer og Vargi. Leikstíll Ármanns var flatur, þeir voru illa vopnaðir, nýttu búnað lítið sem ekkert til að skapa sér tækifæri og unnu einungis eina lotu í síðari hálfleik. Það var því hægur leikur fyrir Sögu að sigla sigrinum heim í þetta skiptið.

Lokastaða: Saga 16 - 7 Ármann

Ljóst er að innkoma Skoon í lið Sögu er til mikilla bóta, en fram að þessu hefur liðið þurft að reiða sig fullmikið á vappaspilarann ADHD og gengi liðsins algjörlega farið eftir dagsformi hans. Í þetta skiptið gátu Skoon, Dom og TurboDrake hins vegar farið fyrir liðinu og verður áhugavert að sjá hvernig þessi breyting kemur til með að hafa áhrif á næstu leiki Sögu. Með sigrinum er Saga komin upp fyrir Ármann og endi liðin jöfn að stigum á Saga innbyrðis viðureignirnar skuldlaust. Næsta skotmark Sögu hlýtur því að teljast XY sem er í sætinu fyrir ofan þá, fjórum stigum á undan, en eins og fyrr segir hafa bæði Cris og Pandaz fært sig frá Sögu til XY. Næsta þriðjudag mætir Saga hins vegar Þór og á föstudaginn tekur Ármann á móti Kórdrengjum og aldrei vita hvort taphrinu Ármanns ljúki þá, enda á Ármann nýju leikmennina KiddaDisco og Snowy enn uppi í erminni. Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.