Óvænt afmælisveisla í Downingstræti enn eitt höggið fyrir Johnson

Boris John­son, for­sætis­ráð­herra Bret­lands, á undir högg að sækja um þessar mundir vegna veislu­halda meðan harðar sam­komu­tak­markanir voru í gildi í Bret­landi en ITV greinir frá því í dag að svo virðist sem að John­son hafi verið viðstaddur af­mælis­veislu í Downing stræti sumarið 2020.

Að því er kemur fram í frétt ITV um málið er talið að Carri­e John­son, eigin­kona for­sætis­ráð­herrans, hafi skipu­lagt ó­vænta af­mælis­veislu um miðjan dag þann 19. júní sem að um 30 manns sóttu. Þá hafi annað teiti átt sér stað um kvöldið.

Að­eins níu dögum fyrr hafði John­son biðlað til al­mennings að forðast sam­komur innan­dyra eftir fremsta megni. Sam­kvæmt þá­verandi reglum máttu að­eins sex manns safnast saman utan­dyra og tveir innan­dyra.

Tals­menn ríkis­stjórnarinnar hafa þó al­farið neitað því að fjöl­mennt teiti hafi farið fram á staðnum heldur hafi að­eins nokkrir fjöl­skyldu­með­limir fagnað með John­son innan­dyra.

Þá hafi hópur starfs­manna sem voru við störf þann dag safnast saman á skrif­stofu John­son til að óska honum til hamingju með daginn. Sjálfur hafi John­son að­eins verið þar í um tíu mínútur.

Fyrr í mánuðinum baðst John­son af­sökunar á því að hafa sótt garð­veislu í Downing­stræti 19 í maí 2020 en hann hefur verið sakaður um að ljúga að breska þinginu um hvað hann vissi um sam­kvæmið.

Hann sagðist hafa talið að um vinnu­við­burð væri að ræða og full­yrti að enginn hefði varað hann við að veislu­höldin væru brot á sam­komu­tak­mörkunum, líkt og Dominic Cummings, fyrr­verandi ráð­gjafi John­son hélt fram.

Guar­dian greindi frá því í síðustu viku að þing­menn breska Í­halds­flokksins væru sagðir leggja drög að því að koma for­sætis­ráð­herranum frá. Fram­ganga hans síðustu vikur og mánuði hafi grafið veru­lega undan trú­verðug­leika hans.