FRÍS: Heimsóknir á Tröllaskaga og Akranes

Hjörtur Leó Guðjónsson skrifar 9. mars 2022 18:31

FVA tryggði sér sæti í undanúrslitum Framhaldsskólaleika Rafíþróttasamtaka Íslands með sigri á Menntaskólanum á Tröllaskaga síðastliðinn fimmtudag, en á meðan keppni stóð var sýnt frá heimsóknum í skólana.

Skólarnir hófu leik í Rocket League. FVA hafði mikla yfirburði og vann að lokum öruggan 2-0 sigur í leik sem náði aldrei að verða spennandi.

Næst kepptu skólarnir í FIFA og þar voru það liðsmenn Menntaskólans á Tröllaskaga sem höfðu betur í fyrri leiknum 2-1, en FVA vann síðari leikinn 6-3 og samanlagður sigur þeirra var því 7-5.

FVA kláraði svo einvígið með 16-4 sigri í CS:GO og varð þar með þriðja og næst seinasta liðið til að tryggja sér sæti í undanúrslitum.

Eins og áður segir var einnig sýnt frá heimsóknum í skólana þar sem Eva Margrét fór á stúfana og tók púlsinn á nemendum og keppendum liðanna, en heimsóknirnar má sjá í spilurunum hér fyrir neðan.

Klippa: FRÍS: Heimsókn í Menntaskólann á Tröllaskaga

Klippa: FRÍS: Heimsókn í FVA

Seinasta viðureign átta liða úrslitanna fer svo fram annað kvöld þegar Tækniskólinn og Menntaskólinn á Egilsstöðum berjast um seinasta lausa sætið í undanúrslitum. Hægt verður að fylgjast með beinni útsendingu frá FRÍS á Stöð 2 eSport og hér á Vísi.

Rafíþróttir Framhaldsskólaleikarnir