Hafa frest til 11. apríl til að kaupa Chelsea

The Raine Group sér um söluna á félaginu og hefur nú gefið fjórum fjárfestahópum glugga til 11.apríl til að ganga frá kaupum á félaginu sem var sett á sölu í kjölfar þess að eignir fyrrum eiganda félagsins, Roman Abramovich, voru frystar vegna innrásar Rússa í Úkraínu.

Til að teljast hæfur til að kaupa Chelsea þarf meðal annars að búa yfir reynslu á uppbyggingu íþróttamannvirkja auk fjölda annarra skilyrða en fjölmargir fjárfestahópar hafa sýnt kaupum á félaginu áhuga.

Nú standa hins vegar aðeins fjórir hópar eftir og hafa þeir aðilar allir mikla reynslu af rekstri íþróttafélaga og þá helst í Bandaríkjunum.