Allar mömmur eiga að geta tekið á­kvörðun fyrir sitt barn

Fegurðardrottningin Arna Ýr heldur úti Instagram-reikningi þar sem hún sýnir hinar ýmsu hliðar af móðurhlutverkinu. Hún er í hjúkrunarfræðinámi sem er skref í átt að draum hennar um að verða ljósmóðir.

Vignir starfar sem kírópraktor og rekur stöðina Líf Kírópraktík. Þá hefur hann getið sér sérstaklega gott orð fyrir meðhöndlun á ófrískum konum og ungbörnum.

Að mati Örnu hefur verið mikill skortur á jákvæðum meðgöngu- og fæðingarreynslum kvenna á netinu. Því ákvað hún að nota samfélagsmiðla til þess að miðla sinni reynslu áfram. Hún deildi ítarlegri fæðingarsögu eftir fæðingu dóttur sinnar árið 2019 og deildi svo hjartnæmu myndbandi eftir fæðingu sonar síns tveimur árum síðar.

Sjá: Arna Ýr deilir mynd­bandi af fæðingu sonar síns

Þá rekur Arna einnig fyrirtækin Taubleyjur.is og Rockit Rocker, en bæði fyrirtækin selja ungbarnavörur. Því er óhætt að segja að þau Arna og Vignir deili sameiginlegri ástríðu fyrir því að aðstoða foreldra.

Taka jafnan þátt í þriðju vaktinni

Þau Arna og Vignir ná einstaklega vel saman og telja þau að þar geti spilað inn í hve líkt uppeldi þau fengu í æsku. Þau segja að verkaskipting heimilisins sé frekar jöfn og þau taki bæði virkan þátt í „þriðju vaktinni“.

„Þegar ég heyri umræðuna um það hvernig þetta er á mörgum heimilinu, 80 prósent hér og 20 prósent hinum megin, þá er ég oft rosa hissa á því hversu vel skipulögð við erum saman. Það eru bara ákveðnir hlutir sem ég tek að mér og ákveðnir hlutir sem hann tekur að sér,“ segir Arna Ýr.

Hún segir það þó ekki endilega vera meðvitað hjá þeim, heldur hafi hlutirnir bara þróast þannig. Þegar álagið er mikið séu þau þó ófeimin við að biðja hvort annað um aðstoð.

„Ég hef séð þetta líka með fólk sem er í teyminu okkar á stofunni, að þegar það koma upp veikindi barns þá er annað foreldrið kannski heima hálfan daginn og svo hitt foreldrið hálfan daginn á móti. Mér líður eins og hjá mörgum sé þetta orðið bara 50/50,“ segir Vignir sem telur að feður séu almennt farnir að taka virkari þátt í heimilislífinu en áður.

Vill geta sett sig í spor kvenna

Það vakti mikla athygli á síðasta ári þegar Arna ákvað að deila fæðingarmyndbandi sonar þeirra. Myndbandið vakti ekki síst athygli fyrir það hve náttúruleg fæðingin var. En sonurinn fæddist í rósabaði uppblásinni sundlaug í stofunni heima hjá þeim.

„Mér finnst bara svo dásamleg tilhugsun að sem ljósmóðir í framtíðinni hafi ég sjálf fætt á nokkrum mismunandi stöðum til þess að geta sett mig í spor kvenna hvort sem þær eru að fæða heima, á fæðingarheimili eða spítala,“ en dóttir þeirra Örnu og Vignis fæddist á fæðingarheimilinu Björkinni.

„Það var einhver sem sagði að ef fæðandi kona væri úti í náttúrunni og svo myndi koma ljón, þá annað hvort fæðir konan samstundis og getur þá tekið barnið og hlaupið í burtu, eða þá að líkaminn fer í algjöran baklás og heldur barninu inni svo mamman geti hlaupið í burtu. Það er oft verið að líkja þessu við spítalann.“

Arna segir að þessi samlíking hafi setið í henni og fengið hana til þess að íhuga vel hvers konar umhverfi hún myndi fæða í.

„Kannski gengur allt vel og þú ert komin með 6-7 í útvíkkun. Þú mætir á spítalann en þarft svo að dúsa þar í þessum miklu verkjum mögulega miklu lengur heldur en ef maður væri bara í sínu eðlilega umhverfi þar sem er ekkert neitt nýtt í umhverfinu, engin öskur eða neitt sem hræðir mann. Það var líka ein ástæðan fyrir því að ég vildi fæða annars staðar.“

„Þó svo eitthvað sé heillandi, þá er öryggið alltaf best fyrir þig“

Arna hafði tekið ákvörðun um það að deila fæðingunni, sama hversu vel eða illa myndi ganga.

„Með því að taka þetta upp og setja þetta á netið þá held ég að þetta sé að hvetja marga til þess að treysta líkamanum sínum og kannski fara svipaða leið.“

Sjá einnig: Móðurmál: Arna Ýr segir góða reynslu af meðgöngu vera tabú

„Það hafa margar konur komið til mín á stofuna og talað um að þær hafi séð að við áttum Nóa heima og Ástrós í Björkinni og þær tala um að þær vilji gera það líka, en þeim líði öruggari á spítalanum. Ég segi alltaf að þó svo eitthvað sé heillandi en þér líður betur í örygginu, þá er öryggið alltaf betra fyrir þig. Ég held maður eigi bara að fylgja sinni sannfæringu um hvar manni líður best,“ segir Vignir.

Keyptu blóm fyrir 73 þúsund

Fæðingarmyndbandið vakti mikla athygli og hafa fjölmargar konur sent Örnu skilaboð, sem hafa verið að íhuga heimafæðingar.

Vignir grínast þó með það að fólk geri sér ef til vill ekki grein fyrir því hve mikill kostnaður fór í öll blómin sem voru í fæðingunni. Það voru ekki aðeins rósir í baðinu, heldur var öll stofan þakin blómum sem kostuðu alls 73 þúsund.

„En þetta var bara það sem hún vildi og þetta lét henni líða vel. Þannig ég sagði við hana að þá bara gerum við það. Við bara búum til það umhverfi sem þú vilt.“

Þrátt fyrir að fæðingarmyndbandið hafi fengið góð viðbrögð segist Arna hafa fengið á sig eina gagnrýni. Það voru ummæli um það að hún væri mögulega að brjóta á rétti barnsins með því að deila fæðingu þess með almenningi.

„Ég held að flestir sem eru að vinna í gegnum samfélagsmiðla séu að passa sig rosalega vel og séu að setja börnin í fyrsta sæti og passa upp á þeirra velferð. Ég held að allar mömmur eigi bara að geta tekið ákvörðun fyrir sitt barn og bara treysta því.“

Arna Ýr og Vignir voru gestir Andreu Eyland í þættinum Kviknar. Hægt er að hlusta á viðtalið í heild sinni í spilaranum hér að ofan.