Fimm vitni höfðu sögur að segja af hegðun Ingólfs

Ingólfur krefst þess að fimm ummæli Sindra um sig verði dæmd dauð og ómerk. Þá krefst hann þriggja milljóna króna í miskabætur. 

Ummælin beinast öll að meintum kynferðisbrotum Ingólfs en Sindri lét ummælin falla í kjölfar þess að aðgerðahópurinn Öfgar birti nafnlausar sögur meintra þolenda tónlistarmannsins.

Heyrði sögu frá systur sinni

Hlynur Hallgrímsson var á meðal vitnanna fimm í dómsal í dag. Þrjú vitnanna komu fyrir dóminn en tvö gáfu skýrslu símleiðis. Hlynur sagðist vita til þess að sextán ára stelpa hefði sofið hjá Ingólfi árið 2008 eftir busaball.

„Ég þekkti til stúlku sem hann pikkar upp á balli árið 2008, hún er 92 módel þessi stúlka eins og systir mín, þáverandi ein af bestu vinkonum systur minnar,“ sagði Hlynur.

„Ég heyri það frá systur minni á þeim tíma að hún hafi smá áhyggjur af vinkonu sinni og vildi ræða við mig. Þessi vinkona hennar segir orðrétt „Ingó reið mér“ og er þarna á 16. aldursári. Við áttum smá samtal ég og systir mín, hún 16 ára og Ingó á aldur við mig.“

Ingólfur er fæddur árið 1986 svo hann var á 22. aldursári árið 2008.

Lýsti ágengni Ingólfs

Þórhildur Rán Torfadóttir var spurð út í ummæli sem hún lét falla í þræði við færslu Sindra á Twitter. Hún sagðist hafa lent í honum sautján ára gömul árið 2008.

„Hann er viðbjóður,“ sagði Þórhildur Rán í ummælum sínum á Twitter. Hún útskýrði orð sín nánar í dómsal.

„Hann var að spila á Humarhátíð á Hornafirði og við rekumst á hann þegar vinkona mín grípur í hann, hvíslar einhverju að honum. Það var eins og hann skildi það sem einhverja viðreynslu. Þarna er hún bara 16 ára, að verða 17. Þetta var mjög ágengt,“ sagði Þórhildur Rán.

Þá sagði hún að vinkona hennar hefði staðið fyrir balli hjá nemendafélagi í menntaskóla.

„Hann var búinn að ákveða að annað hvort ætti hún að fara með honum heim eða finna einhverja aðra til að fara með honum. Einhvern veginn dró hún mig inn í það en hann endaði á því að vera dreginn út í leigubíl.“

Þá hafði hún þriðju sögu að segja af Ingólfi, af litla sviðinu á Þjóðhátíð.

„Hann var að reyna að dansa við stelpu, ég þekki hana ekki persónulega, en það voru allir að segja honum að slaka á því hún var bara 16 ára en hann hlustaði ekki á það. Það voru fleiri að grípa inn í og ég fór bara.“

Ingólfur hristi hausinn undir þessum vitnisburði og tautaði eitthvað fyrir munni sér.

Lýsti bílastæðavakt

Elísa Snæbjörnsdóttir bar næst vitni, blómasjúk og prjónandi feminískur aktivisti eins og hún lýsir sjálfri sér á Twitter. Hún rifjaði upp þegra hún var að vinna á grunnskólaballi árið 2009.

„Þá höfðu ungmenni og starfsfólk heyrt af því að Ingó hafi verið að tæla stelpur upp í bíl nokkrum dögum áður. Við vorum með vakt á bílastæðinu að passa upp á að það færu engar stelpur upp í bíl til hans,“ sagði Elísa.

„Ég veit af því að þáverandi formaður Samfés sagði mér frá því að ungmennaráð og stjórn Samfés hafi verið að ráða til sín listamenn fyrir samfestinginn sem átti að sýna á Rúv. Þá voru tvær stelpur í ungmennaráðinu á grunnskólaaldri sem mótmæltu því að hann væri kynnir þar. Ein sagðist hafa verið „groomuð“ af Ingó og hin átti bestu vinkonu sem hafði lent í því.“

Elísa sagst ekki sjálf hafa verið á bílastæðavaktinni en ein sem vann með henni hefði staðið vaktina.

„Það voru nokkrir starfsmenn sem höfðu samband við mig á Facebook, þeir muna líka eftir þessari vakt. Ég hef líka heyrt í fyrrum stjórn samfés og þau muna líka eftir þessu. Það var óskrifuð regla að hann fengi ekki að spila.“

Vaktin hafi ekki dugað til.

„Það var enginn sem fór upp í bíl með honum á þessu vaktaða svæði en það gerðist við sjoppu sem var ekki vöktuð. Ég er með þessar upplýsingar frá fyrstu hendi.“

Neituðu Ingó um inngöngu

Daníel Ingi Sigþórsson bar líka vitni en hann tjáði sig við færslu Sindra á Twitter.

„Þetta var fyrir næstum því 10 árum síðan. Þetta var vorið 2014 sem þetta gerðist. Vinkona mín var 17 ára. Við vorum í partýi að fagna leiklistarsýningu sem við vorum með, lítill leiklistarhópur. Síðan leið á kvöldið og vinkona mín var frekar ölvuð og segir að umræddur tónlistarmaður væri á leiðinni að hitta hana. Orðræða hennar um kvöldið var þannig að hann væri ekki bara að fara að vera vinur hennar,“ sagði Daníel.

„Við tókum það ekki í mál að þetta væri að fara að gerast. Hún var orðin frekar ölvuð og okkur fannst hún ekki geta tekið ákvörðun um svona. Við neituðum honum inngöngu og hún endaði á því að „crasha“ á sófanum hjá okkur.“

Daníel var spurður að því hvernig Ingólfur og stelpan þekktust.

„Hún er frá Selfossi veit ég og þau voru búin að tala eitthvað saman, ég veit ekki á hvaða samfélagsmiðlum. Meira veit ég ekki hvernig þau þekktust,“ sagði Daníel Ingi. Ingólfur er sem kunnugt er frá Selfossi.

Vinkona hafi falið sig fyrir Ingó

Síðust bar vitni Margrét Ásta Arnarsdóttir. Margrét, sem er 32 ára, rifjaði upp sín kynni af Ingólfi en hún tjáði sig líka á Twitter um málið. Hún var spurð út í ummæli sín þar.

„Ég er að minnast á þegar ég var á Ólíver með vinkonu minni sem er tveimur árum yngri en ég. Umræddur maður var þar með trúbadorkvöld eða eitthvað. Umrædd vinkona mín var að fela sig á bak við mig og ég spurði af hverju. Þá sýndi hún mér skilaboð sem hann hafi verið að senda á sig,“ sagði Margrét Ásta.

„Seinna um það kvöld sagði hún að hann hafi verið að elta sig. Hún sagði að þetta hafi verið yfir miklu lengri tíma sem hann hafi verið að senda á sig skilaboð.“

Margrét Ásta sagði skilabðin hafa verið kynferðislegs eðlis.

Vitnisburði í dómsal er lokið og málflutningur lögmanna fram undan.