Dásamlegt að búa á Ströndum

Hólmavík stendur við Steingrímsfjörð og er stærsti þéttbýlisstaðurinn á Ströndum. Þéttbýli tók að myndast á Hólmavík seint á 19. öld. Verslun hefur verið stunduð þar frá árinu 1895 en elsta byggingin sem þar stendur er verslunarhús sem kaupmaðurinn Richard Peter Riis reisti árið 1897 en þar er nú rekið hið rómaða veitingahús Café Riis.

Konan, sem veit allt um Hólmavík og Strandirnar er skrifstofustjóri Strandabyggðar, hún gengur í öll verk, veit allt og er alltaf kát og hress. Hún heitir Salbjörg Engilbertsdóttir.

„Það er stutt í allar áttir, það er álíka langt til Ísafjarðar og Reykjavíkur og norður í Árneshrepp og Akureyri, þannig að við erum bara vel sett. Við erum um 430 í sveitarfélaginu öllu, þar af um 250 á Hólmavík,“ segir Salbjörg.

Þekktasta safnið á Hólmavík er Galdrasetrið, magnað safn, sem er mjög skemmtilegt að skoða.

„Eldra fólk hérna á Hólmavík var ekkert hrifið af þessari hugmynd að fara að opna galdrasýningu en svo þegar það sá sýninguna og hvernig hún var gerð var það mjög ánægt með þetta, þetta væri nú vel gert,“ segir Anna Björk Þórarinsdóttir, framkvæmdastjóri Strandagaldurs á Hólmavík og bætir við.

„Fólk hérna, heimafólk kemur með gesti, þetta er staðurinn til að segja fólki að heimsækja, fólk kemur með gestina hingað, sem er frábært.“

Skrifstofustjórinn segir Strandabyggð eigi mikla og bjarta framtíð fyrir sér.

„Já, hér er stutt í náttúruna, stutt að fara í alla hreyfingu og hér eru frábærir veitingastaðir, hér er frábært tjaldsvæði og íþróttamiðstöð og góður skóli. Við höfum ekki yfir neinu að kvarta,“ segir Salbjörg.

Já, talandi um skólann, þar eru 43 nemendur og á vorhátíðinni nýlega var m.a. keppt um sterkasta nemanda skólans þegar keppt var í því að draga bíl.

„Við erum grænfána skóli og erum að stefna á heilsueflandi skóla. Síðan erum við í heilmiklu samstarfi við skóla út um allt land. Hér eru afskaplega duglegir og skemmtilegir nemendur,“ segir Hrafnhildur Guðbjörnsdóttir, skólastjóri á Hólmavík.

Hrafnhildur Skúladóttir er íþrótta- og tómstundafulltrúi á Hólmavík og hún sér líka um tjaldsvæðið og sundlaugina og íþróttahúsið. Hún segir tjaldsvæðið mjög vinsælt hjá ferðamönnum.

„Já, það er svona miðja vegu vestur, gott að keyra hingað og halda svo áfram. Það besta við tjaldsvæðið er friðurinn, fuglasöngurinn og rigningin þegar það rignir. Tjaldsvæðið er náttúrulega við hliðina á sundlauginni, þar er góð þjónusta. Þar er líka flottur sundlaugagarður, þar er logn, þannig að fjölskyldur koma gjarnan og eru bara í nokkra daga,“ segir Hrafnhildur.

En hvað segja íbúarnir, hvernig fólk eru Strandamenn?

„Það sem mér finnst gott við að búa á Ströndum er að ef manni dettur í hug og langa að gera eitthvað þá gerir maður það bara. Maður heldur viðburði. Strandamenn eru jákvæðir og skemmtilegir, pínulítið skrýtnir en já, mjög skemmtilegt fólk sem býr hérna,“ segir Esther Sigfúsdóttir.

„Ég held að Strandamenn hafi mjög sterka ímynd í huga fólks, sem einhverskonar náttúrubörn og kannski dálitlir skrítlingar en auðvitað eru þeir svo bara eins og venjulegt fólk þegar öllu er á botninn hvolft og allskonar fólk er auðvitað í þessum hópi,“ segir Jón Jónsson.

„Það er dásamlegt að búa hérna. Félagslíf er geggjað, við höfum nóg að gera, það er kannski eitthvað, sem fólk áttar sig ekki á í svona litlu samfélagi, það er rosalega mikið um að vera. Ég finn mig gríðarlega vel, ég er kórum, leikfélagi og ég veit ekki hvað og hvað, þetta er bara lífið,“ segir Eiríkur Valdimarsson.

Unglingarnir í félagsmiðstöðinni Óson eru mjög sáttir við að búa á Hólmavík, þar líður þeim öllum vel og eru miklir vinir. Nú eru þau mörg hver á leiðinni í framhaldsskóla víða um land en snúa vonandi til baka að námi loknu.

Heimasíða Strandabyggðar