Til­boð hefur borist í Laugar í Sælings­dal

Eyjólfur Ingvi Bjarnason, oddviti Dalabyggðar, staðfestir í samtali við Vísi að tilboð hafi borist en segist ekkert frekar geta tjáð sig um málið, enda sé það undirorpið trúnaði.

Laugar í Sælingsdal eru falar fyrir 320 milljónir króna, að því er kemur fram á fasteignavef Vísis.

Um er að ræða fornfrægan sögustað þar sem áður var skóli sem síðar var breytt í hótel og skólabúðir. Tíu hús eru í þorpinu með alls 42 herbergjum. Þá er íþróttahús á svæðinu ásamt sundlaug og náttúrulauginni Guðrúnarlaug.

Þegar þorpið var fyrst sett á sölu árið 2016 var uppsett verð 530 milljónir króna. Frá því að þorpið var auglýst til sölu hafa tveir mögulegir kaupendur komist langt í kaupferlinu. Árið 2018 hafnaði Dalabyggð 460 milljóna króna kauptilboði vegna óánægju íbúa með skilyrði um forgangsröðun veðréttinda í þorpinu. 

Árið 2019 var síðan fallið frá samþykktu tilboði af hálfu tilboðsgefenda vegna þess að þeir gátu ekki fjármagnað kaupin en tilboðið hljóðaði upp á 320 milljónir króna.