Jesus: Kom til Arsenal til að vinna bikara

Jesus, sem er 25 ára gamall, þekkir það nokkuð vel að vinna bikara. Jesus kom til Englands frá Brasilíu árið 2017 og á síðustu fimm árum hefur hann unnið ensku úrvalsdeildina fjórum sinnum, þrisvar sinnum hefur hann lyft deildarbikarnum og einu sinni staðið uppi sem sigurvegari í FA bikarkeppninni.

„Í lok tímabils þá vil ég vinna eitthvað. Allir hjá Arsenal vilja þetta sama, vinna bikara. Það er eina leiðin fyrir mig til að skrá mig í sögubækurnar hjá þessu stóra félagi,“ sagði Gabriel Jesus í viðtali við Goal.com. 

„Þetta er stór klúbbur sem er með stórt verkefni í gangi. Þegar Edu [yfirmaður knattspyrnumála hjá Arsenal] útskýrði fyrir mér hvað félagið vill gera í framtíðinni þá varð ég mjög spenntur fyrir því að koma til Arsenal af því að ég er mjög hrifinn af þessu verkefni sem er í gangi,“ bætti Jesus við sem sagðist 100% staðráðinn í að skipta yfir til Arsenal eftir að hafa átt samtal við knattspyrnustjóra liðsins, Mikel Arteta.

„Ég hef unnið áður með Mikel [Arteta] og þekki hans hugsjónir aðeins. Ég veit hvernig hann vill spila fótbolta. Ég held að aðferðir hans eru svipaðar og aðferðir Pep Guardiola og það hentar mér.“

„Það eru margir hæfileikaríkir leikmenn hérna og margir ungir leikmenn eins og ég. Við erum allir saman í þessu, eins og fjölskylda. Við eigum eftir að spila vel og æfa vel. Í lok tímabils er ég viss um að við munum vinna eitthvað,“ sagði Gabriel Jesus.

Jesus byrjar tíma sinn hjá Arsenal af krafti en það tók hann ekki nema 85 sekúndur að skora sitt fyrsta mark fyrir félagið, í æfingarleik gegn Nurnberg í gær. Jesus skoraði tvö mörk í leiknum.